Hingoli News : हिंगोली शहरालगत असलेल्या खटकाळी हनुमान मंदिराच्या भिंतीला चोरट्याने भगदाड पाडून आत प्रवेश करत दानपेटी चोरी केल्याची घटना उघडकीस आली आहे. विशेष म्हणजे मंदिरात शिरल्यानंतर चोरट्याने प्रथम हनुमानाच्या मूर्तीला नमस्कार केला आणि त्यानंतर दानपेटी घेऊन पसार झाला. बुधवारी (११ मार्च) सकाळी हा प्रकार समोर आला आहे. मिळालेल्या माहितीनुसार, मंगळवारी रात्री पूजा आणि आरतीनंतर पुजाऱ्यांनी मंदिर बंद करून बाजूच्या खोलीत विश्रांतीसाठी गेले होते. मध्यरात्रीच्या सुमारास अज्ञात चोरट्याने मंदिराच्या बाजूच्या भिंतीला भगदाड पाडून आत प्रवेश केला. मंदिरात प्रवेश केल्यानंतर त्याने हनुमानाच्या मूर्तीला नमस्कार केला आणि तेथील दानपेट्यांची पाहणी केली. मोठी दानपेटी उचलणे कठीण असल्याने चोरट्याने लहान दानपेटी उचलून घेतली आणि ज्या भगदाडातून आत आला त्याच मार्गाने पळ काढला. बुधवारी सकाळी मंदिरातील हा प्रकार लक्षात येताच तात्काळ पोलिसांना कळवण्यात आले. त्यानंतर हिंगोली शहर पोलिस ठाण्याचे पोलिस निरीक्षक संदीप मोदे यांच्या पथकाने घटनास्थळी भेट देऊन पाहणी केली. या पथकात जमादार संजय मार्के, अशोक धामणे, गणेश लेकुळे, संतोष करे, शेख मुजीब आणि शंकर ठोंबरे यांचा समावेश होता. घटनास्थळावरील सीसीटीव्ही फुटेज तपासताना एक संशयित चोरटा कॅमेऱ्यात कैद झाल्याचे आढळून आले आहे. पोलिसांकडून त्याची ओळख पटविण्याचे प्रयत्न सुरू आहेत. दरम्यान, यापूर्वीही या मंदिरातील दानपेटी फोडल्याची घटना घडल्याची माहिती समोर आली असून पोलिस पुढील तपास करत आहेत.
