हिंगोली : सेनगाव तालुक्यातील मौजे हिवरखेडा येथील जिल्हा परिषद प्राथमिक शाळेतील पहिली ते आठवीपर्यंत शिक्षण घेणाऱ्या विद्यार्थ्यांच्या भविष्यावर सध्या मोठे प्रश्नचिन्ह उभे राहिले आहे. शाळेत आठ वर्ग असताना, विद्यार्थ्यांना शिकवण्यासाठी मात्र केवळ तीनच शिक्षक उपलब्ध आहेत. “आम्ही शिक्षण घ्यायचे तरी कसे?” असा संतप्त सवाल येथील विद्यार्थी आणि ग्रामस्थांनी प्रशासनाला विचारला आहे. सध्या हिवरखेडा येथील जिल्हा परिषद शाळेत तब्बल ८७ विद्यार्थी शिक्षण घेत आहेत. परंतु, केवळ तीन शिक्षक असल्यामुळे एक शिक्षक मुख्याध्यापकीय कामाच्या ‘बाहेरच्या लोड’मध्ये असतो, आणि उर्वरित दोन शिक्षकांवर आठ वर्ग सांभाळण्याची व त्यांना शिकवण्याची नामुष्की ओढवली आहे. “दोन शिक्षकांनी आठ वर्ग कसे सांभाळायचे व विद्यार्थ्यांना काय शिकवायचे, असा प्रश्न आम्हाला पडला आहे. जर हीच परिस्थिती राहिली, तर एक दिवस शाळा बंद पडेल.”, अशी प्रतिक्रिया ग्रामस्थांनी दिली आहे. आयएएस अधिकारी घडवणाऱ्या शाळेलाच शिक्षकांची उणीव – याच जिल्हा परिषद शाळेतून शिक्षण घेऊन गावचे सुपुत्र योगेश निरगुडे हे आयएएस अधिकारी झाले आहेत. त्यांच्या मार्गदर्शनाखाली ही शाळा पूर्णपणे डिजिटल करण्यात आली आहे. तसेच, ग्रामस्थांनी वर्गणी जमा करून शाळेची आकर्षक रंगरंगोटी केली आहे. शाळा डिजिटल होऊनही आणि माजी विद्यार्थ्यांचे मोठे योगदान असूनही, आज त्याच शाळेमध्ये शिक्षकांची मोठी उणीव जाणवत आहे. गरीब शेतकऱ्यांची मुले या शाळेत मोठ्या विश्वासाने शिक्षण घेत आहेत, मात्र शिक्षकांच्या कमतरतेमुळे काही ग्रामस्थांनी आपल्या पाल्यांना जिल्हा परिषद शाळेतून काढून बाहेरगावी शिक्षणाकरिता पाठवण्यास सुरुवात केली आहे. शालेय समितीच्या वतीने या गंभीर समस्येबाबत दिनांक २२/०९/२०२५ रोजी सेनगाव येथील शिक्षण अधिकारी यांना निवेदन देण्यात आले होते. मात्र, या निवेदनाची कोणतीही दखल प्रशासनाने घेतली नाही. परिणामी, पुन्हा हिवरखेडा येथील शालेय समिती आणि ग्रामस्थांनी हिंगोली येथील जिल्हा परिषद शिक्षण अधिकाऱ्यांकडे निवेदन सादर केले आहे. येत्या दोन ते चार दिवसांत हिवरखेडा येथील जिल्हा परिषद शाळेमध्ये शिक्षक भरती नाही केली, तर हिवरखेडा ग्रामस्थांच्या वतीने विद्यार्थ्यांना घेऊन थेट ‘सीईओ’च्या दालनासमोर शाळा भरवण्यात येईल. या गंभीर इशारानंतर जिल्हा परिषद प्रशासन यावर कोणती तात्काळ कारवाई करते, याकडे हिवरखेडा येथील पालकांचे आणि विद्यार्थ्यांचे लक्ष लागले आहे.
