हिंगोली (शिवशंकर निरगुडे): हिंगोली जिल्ह्यातील सेनगाव तालुक्यातील बोरखडी या छोट्याशा ग्रामीण भागातून आलेल्या श्रीपाद मंगलराव हराळ याने दक्षिण कोरिया ओपन एरोबिक्स जिम्नॅस्टिक्स स्पर्धेत कांस्यपदक पटकावून जिल्ह्याच्या शिरपेचात मानाचा तुरा रोवला आहे. भारताला या स्पर्धेत एकूण दोन कांस्यपदके मिळाली, त्यामध्ये श्रीपादने केलेल्या उत्कृष्ट कामगिरीबद्दल त्याचे सर्व स्तरांतून सध्या कौतुक होत आहे. बुसान येथे ११ देशांचा सहभाग – बुसान (Busan), दक्षिण कोरिया येथे नुकत्याच पार पडलेल्या १० व्या कोरिया ओपन चॅम्पियनशिप २०२५ (दिनांक २१ ते २४ नोव्हेंबर) मध्ये भारतीय संघाने चमकदार कामगिरी केली. ११ देशांचा सहभाग असलेल्या या स्पर्धेत भारताने वरिष्ठ गटाच्या समूह (Group) व एरो स्टेप (Aero Step) या दोन प्रकारांत दोन कांस्यपदकांची कमाई केली. श्रीपाद हराळचा एरो स्टेप संघात समावेश – भारतीय संघाने जिंकलेल्या एरो स्टेप प्रकारातील कांस्यपदकामध्ये हिंगोलीचा श्रीपाद हराळ याचा मोलाचा वाटा आहे. या पदकविजेत्या संघात संदेश चिंतलवाड, अभय उंटवाल, दीपक अर्जुन, प्रेम बनकर, संकेत चिंतलवाड, रोहन पगारे, तनिष्क राजेगावकर, आणि श्रीपाद हराळ यांचा समावेश होता. याव्यतिरिक्त, वरिष्ठ समूह गटांत कांस्यपदक जिंकणाऱ्या खेळाडूंत आर्य शहा, स्मित शहा, रामदेव बिराजदार, उदय मधेकर, अद्वैत वझे यांचा समावेश होता. श्रीपाद हराळची आतापर्यंतची यशस्वी कामगिरी – या यशाने श्रीपाद हराळ याच्या आंतरराष्ट्रीय आणि राष्ट्रीय स्तरावरील यशस्वी कारकिर्दीत आणखी एक मानाचा तुरा रोवला गेला आहे. यापूर्वी त्याने अनेक स्पर्धांमध्ये सुवर्ण आणि कांस्य पदके मिळवली आहेत: ट्रिकूट स्पर्धा (२०१७): १८ वी एरोबिक जिम्नॅस्टिक्स राज्य स्पर्धा, परभणी – सुवर्णपदक तिघांची स्पर्धा (२०१७): १४ वी एरोबिक जिम्नॅस्टिक्स राष्ट्रीय स्पर्धा, कर्नाटक, बंगलोर – सुवर्णपदक टंबलिंग (२०२४): १८ वी ट्रॅम्पोलिन आणि टंबलिंग जिम्नॅस्टिक्स राज्य चॅम्पियनशिप, पुणे – कांस्यपदक मिश्र जोडी (२०२४): २४ वी एरोबिक जिम्नॅस्टिक्स राज्य स्पर्धा, मुंबई – सुवर्णपदक मिश्र जोडी व एरो स्टेप (२०२४-२५): १९ वी वरिष्ठ एरोबिक जिम्नॅस्टिक्स राष्ट्रीय स्पर्धा, जम्मू – सुवर्णपदक (दोन) मिश्र जोडी (२०२५): ३८ वे राष्ट्रीय खेळ, डेहराडून, उत्तराखंड – कांस्यपदक मिश्र जोडी व एरो स्टेप (२०२५): २० वी वरिष्ठ एरोबिक जिम्नॅस्टिक्स राष्ट्रीय स्पर्धा, केरळ – सुवर्णपदक (दोन) आंतरराष्ट्रीय पंचांचा सहभाग – या स्पर्धेत शिवछत्रपती पुरस्काराने सन्मानित आणि राज्य संघटनेचे सचिव असलेले मकरंद जोशी यांना आंतरराष्ट्रीय पंच व एशियन एरोबिक जिम्नॅस्टिक्स युनियनचे तांत्रिक समिती सदस्य म्हणून प्रथमच ‘डिफिकल्टी पंच’ म्हणून काम करण्याची संधी मिळाली. संघासोबत प्रशिक्षक म्हणून विजय इंगळे, धैर्यशील देशमुख, हर्षल मोगरे यांनी, तर संघ व्यवस्थापक म्हणून दीपाली बजाज यांनी जबाबदारी पार पाडली. सर्व स्तरातून अभिनंदनाचा वर्षाव- या दिमाखदार यशाबद्दल जिम्नॅस्टिक्स फेडरेशन ऑफ इंडियाचे अध्यक्ष सुधीर मित्तल, राज्य संघटनेचे अध्यक्ष संजय शेटे, उपाध्यक्ष आदित्य जोशी, ‘साई’च्या उपसंचालिका मोनिका घुगे, क्रीडाउपसंचालक शेखर पाटील, मसांमचे अध्यक्ष राम पातूरकर, सचिव हेमंत पातूरकर, जिल्हा संघटनेचे कार्याध्यक्ष अॅड. संकर्षण जोशी, प्रशिक्षक संजय मोरे, तनुजा गाढवे यांच्यासह अनेक मान्यवरांनी पदक विजेत्यांचे हार्दिक अभिनंदन केले आहे.
