हिंगोली (शिवशंकर निरगुडे): देशाच्या सीमेवर जीवाची बाजी लावून संरक्षण करणाऱ्या सैनिकांचं स्वप्न अनेकांच्या मनात असतं, पण ते प्रत्येकाचं पूर्ण होत नाही. मात्र, हिंगोली जिल्ह्यातील सेनगाव तालुक्यातील हिवरखेडा गावाचा सुपुत्र सिताराम तुळशीराम फुपाटे यांनी हे स्वप्न साकार करत १७ वर्षे, १ महिना आणि १२ दिवस देशसेवा केली. सेवानिवृत्तीनंतर २ एप्रिल २०२५ रोजी गावकऱ्यांनी त्यांच्यासाठी भव्य स्वागत समारंभ आयोजित केला. ढोल-ताशांच्या गजरात मिरवणूक, फटाक्यांची आतषबाजी आणि भावुक क्षणांनी हा सोहळा अविस्मरणीय ठरला.

गाव सजलं, स्वागताला उभं राहिलं –
सिताराम फुपाटे दोन दिवसांपूर्वी सैन्यातून निवृत्त होऊन घरी परतले. त्यांच्या स्वागतासाठी संपूर्ण गाव सज्ज झालं होतं. गावात ठिकठिकाणी स्वागताचे फलक लावण्यात आले, घरोघरी रांगोळ्या काढल्या गेल्या. हिवरखेडा जिल्हा परिषद प्राथमिक शाळेत आयोजित सेवापूर्ती सत्कार सोहळ्यात शाळेतील विद्यार्थी-विद्यार्थिनींनी पुष्पगुच्छ घेऊन जवानाचं स्वागत केलं. गंगाराम खुडे सर यांच्या मार्गदर्शनाखाली हा अनोखा कार्यक्रम पार पडला. गावातून काढलेल्या मिरवणुकीत संपूर्ण गाव आणि पंचक्रोशीतील नागरिक सहभागी झाले होते.

भावुक क्षण आणि कुटुंबाचा आनंद –
सिताराम फुपाटे गावात पोहोचताच फटाक्यांनी आकाश उजळलं. कुटुंबीयांनी गोडधोड खाऊ घालून त्यांचं औक्षण केलं. १७ वर्षांहून अधिक काळ देशसेवा करून सुखरूप परतलेल्या जवानाला पाहून कुटुंबीयांसह गावकऱ्यांच्या चेहऱ्यावर आनंद ओसंडून वाहत होता. या प्रसंगी संपूर्ण गाव भावनावश झालं. जवानाच्या कुटुंबीयांनी आतुरतेने वाट पाहिलेला हा क्षण अखेर सत्यात उतरला. या आनंदात सहभागी होण्यासाठी नातेवाईक आणि परिसरातील लोकांनीही मोठी गर्दी केली होती.

गावकऱ्यांचा अनोखा उपक्रम –
सेवानिवृत्तीच्या निमित्ताने सिताराम फुपाटे आणि त्यांच्या कुटुंबीयांनी गावकऱ्यांसाठी जेवणाची व्यवस्था केली. या जंगी स्वागताने जवानाचा सन्मान तर झालाच, पण गावकऱ्यांमधील एकी आणि प्रेमही दिसून आलं. हिवरखेडा गाव सजून-धजून या सत्कार सोहळ्यासाठी उभं होतं, जणू देशसेवेचा सन्मान करणारा एक उत्सवच साजरा झाला.

मान्यवरांची उपस्थिती
या सोहळ्यास जिल्हा परिषद उपाध्यक्ष अनिल पतंगे, जिल्हा सैनिक संघटनेचे अध्यक्ष रवींद्र गडदे, राष्ट्रवादी सेनगाव तालुका अध्यक्ष, शिक्षणाधिकारी दत्ता नांदे, कैलास निरगुडे (एसटीआय अधिकारी, वाशिम), माजी रिटायर्ड आर्मी विष्णू खेलबाडे, सौ. पूजा अमोल मस्के, शालेय शिक्षण समिती अध्यक्ष भगवान निरगुडे, मुख्याध्यापक वामन हराळ, दीपक मोरे आणि शाळेतील शिक्षकवृंद उपस्थित होते. याशिवाय पत्रकार शिवशंकर निरगुडे, शरद निरगुडे, शिवाजी गायकवाड, प्रदीप हराळ, कडूजी इंगळे, विलास हराळ, राजेश देसाई, दत्ता देसाई, स्वप्निल हराळ, गोलू हराळ यांच्यासह गावातील प्रतिष्ठित नागरिक, ग्रामपंचायत सदस्य आणि ग्रामस्थांनी हजेरी लावली.

देशसेवेचा गौरव
सैन्यात भरती होऊन देशाचं रक्षण करण्याचं स्वप्न सिताराम फुपाटे यांनी पूर्ण केलं आणि निवृत्तीनंतर गावकऱ्यांनी त्यांचा जोरदार सन्मान केला. हा सोहळा केवळ एका जवानाचं स्वागत नव्हतं, तर देशसेवेच्या समर्पणाचा आणि गावकऱ्यांच्या एकजुटीचा उत्सव होता.