मुंबई : पुण्‍यातील एल्‍गार परिषद आणि भिमा कोरेगाव प्रकरणी ६ वर्षांपूर्वी अटक करण्‍यात आलेल्‍या रोना विल्‍सन आणि सुधीर ढवळे यांना अखेर मुंबई उच्‍च न्‍यायालयाने बुधवारी जामीन मंजुर केला आहे. या दोन्‍ही आरोपींविरोधात आरोप निश्‍िचत करण्‍यात अपयश आल्‍याने एनआयए तपास यंत्रणेवर न्‍यायालयाने तीव्र शब्‍दांत ताशेरे ओढले.

न्‍या. अजय गडकरी आणि न्‍या. कमल खता यांच्‍या अध्‍यक्षतेखालील खंडपीठाने या दोघांनी ६ वर्षांहून अधिक काळ तुरुंगात अंडरट्रायल म्‍हणून घालवला असल्‍याने त्‍यांना एक लाख रुपयांच्‍या जात मुचलक्‍यावर जामीन मंजूर केला. सुनावणीवेळी खंडपीठाने नमुद केले की, आरोपी 2018 पासून तुरुंगात आहेत. या खटल्यातील आरोप देखील निश्चित करणे बाकी आहे.

तसेच फिर्यादी पक्षाने 300 हून अधिक साक्षीदारांचा हवाला दिला असल्‍याने नजीकच्या काळात खटला पूर्ण होण्याची शक्यता नाही. या जामीन आदेशासह अटक केलेल्या 16 पैकी 10 जणांना आतापर्यंत जामीन मिळाला आहे. यापूर्वी वरवरा राव, सुधा भारद्वाज, आनंद तेलतुंबडे, व्हर्नन गोन्साल्विस, अरुण फरेरा, शोमा सेन, गौतम नवलखा आणि महेश राऊत यांना जामीन मंजूर करण्यात आला होता.

दरम्‍यान, 31 डिसेंबर रोजी पुण्यात झालेल्या एल्गार परिषदेमध्ये प्रक्षोभक भाषण करण्यात आरोपींचा सहभाग असल्याचा आरोप करत पुणे पोलिसांनी 2018 मध्ये गुन्‍हा नोंदवला होता. यानंतर दुसऱ्या दिवशी पुणे जिल्ह्यातील भीमा–कोरेगाव येथे हिंसाचार भडकला होता. या परिषदेला माओवाद्यांचा पाठिंबा असल्याचा दावा पुणे पोलिसांनी केला होता.