Parivarik Manuranjan Teaser : बॉलिवूडमधील दमदार अभिनेते पंकज त्रिपाठी आणि अभिनेत्री अदिती राव हैदरी यांच्या प्रमुख भूमिका असलेल्या ‘कौटुंबिक मनोरंजन’ या चित्रपटाचा टीझर प्रदर्शित झाला आहे.

पहिल्यांदाच एकत्र झळकणार पंकज त्रिपाठी आणि अदिती राव हैदरी

या चित्रपटाच्या निमित्ताने पंकज त्रिपाठी आणि अदिती राव हैदरी पहिल्यांदाच एकत्र स्क्रीन शेअर करताना दिसणार आहेत. टीझरमध्ये दोघांमधील संवाद आणि त्यांच्यात हळूहळू निर्माण होणारी जवळीक पाहायला मिळते. आपल्या सहजसुंदर अभिनयासाठी ओळखले जाणारे पंकज त्रिपाठी पुन्हा एकदा विनोदी अंदाजात चाहत्यांच्या भेटीला येणार आहेत.

नेमकी काय आहे चित्रपटाची कथा?

टीझरमध्ये हेलनची भूमिका साकारणारी अदिती राव हैदरी ही रंजन दुबे म्हणजेच पंकज त्रिपाठी यांच्या घराचा दरवाजा ठोठावते. दिल्लीहून आल्याचे सांगत ती त्यांना प्रॉपर्टी मॅनेजर आणि हाऊसकीपरची गरज आहे का, अशी विचारणा करते. त्यानंतर ती घरात प्रवेश करते आणि एवढ्या मोठ्या घराची देखभाल करण्यासाठी किती मेहनत घ्यावी लागेल, असे म्हणते.

 

View this post on Instagram

 

A post shared by Sony LIV (@sonylivindia)

घरात किती सदस्य राहतात, अशी विचारणा केल्यानंतर रंजन दुबे या मोठ्या घरात एकटाच राहत असल्याचे आणि लग्न झाले नसल्याचे सांगतात. ही गोष्ट ऐकून हेलनला आश्चर्य वाटते. त्यानंतर दोघांमध्ये संवाद वाढतो आणि ते एकमेकांसोबत वेळ घालवू लागतात. हेलन आणि रंजन दुबे यांच्या नात्याला पुढे कोणते वळण मिळणार? त्यांच्या मैत्रीचे रूपांतर प्रेमात होणार का? तसेच त्यांच्या आयुष्यात कोणत्या कौटुंबिक आणि सामाजिक समस्या निर्माण होणार? या प्रश्नांची उत्तरे चित्रपट पाहिल्यानंतरच मिळतील.

सोनी लिव्हवर होणार प्रदर्शित

‘कौटुंबिक मनोरंजन’ हा चित्रपट सोनी लिव्ह या ओटीटी प्लॅटफॉर्मवर प्रदर्शित होणार आहे. मात्र, चित्रपटाच्या प्रदर्शनाची तारीख अद्याप जाहीर करण्यात आलेली नाही.

Samorchya Gharat: महावितरणच्या राज्यस्तरीय नाट्यस्पर्धेत कोल्हापूर परिमंडलाचे ‘समोरच्या घरात’ द्वितीय