प्रभात वृत्तसेवा पुणे – ढगांचा गडगडाट आणि विजांचा कडकडाट करीत गुरूवारी (दि. १८) दुपारनंतर शहरासह उपनगराला पावसाने झोडपून काढले. दीड ते दोन तास पडलेल्या धो-धो पावसाने कोथरूड, औंध, पाषाण, वारजे, बाणेर, धायरी, कात्रज, कळस, धानोरी परिसराला चांगलेच झोडपून काढले. काही परिसरात अति मुसळधार तर ढगफुटीसदृश्य पावसाने जनजीवन विस्कळीत झाले. औंध पाषाण परिसरात अवघ्या दिड तासात तब्बल ८३ मिमी पावसाची नोंद झाली. त्यामुळे धायरी, कोथरूड, औंध, बाणेर मधील रस्त्यांना नद्यांचे स्वरूप आले होते. पावसाचे पाणी साचल्याने बाणेर रस्त्यावरील वाहतूक काही काळ बंद असल्याने वाहतूक कोंडी झाली होती. शहरासह जिल्ह्यात मागील ४८ तासांपासून पावसाने विश्रांती घेतली. गुरूवारी (दि. १८) सकाळपासून आकाश सामान्यत: ढगाळ असल्यामुळे पावसाच्या हलक्या सरी पडतील, असे वाटत असताना दुपारी दीड ते दोन वाजेनंतर कात्रज, धायरी, नांदेड फाटा, सिंहगड रस्ता, धकनवडी, हांडेवाडी परिसरात पावसाच्या जोरदार सरींना सुरूवात झाली. त्यानंतर कोथरूड, पाषाण, वारजे आणि औंध परिसरासह उपनगर आणि शहराच्या मध्यवर्ती भागात पावसाला सुरूवात झाली. थोडावेळ पडेल आणि विश्रांती घेईल, असे वाटत असताना, आकाशात काळे ढग भरून आले. विजांच्या कडकडाटासह पावसाचा जोर वाढला आणि धो-धो पावसाने पुणे शहरासह उपनगरीय भागाला झोडपून काढले. पाषाण-औंध परिसरात सर्वाधिक ८० मिमी पावसाची नोंद झाली. पाषाण ८०, शिवाजीनगर येथे ४०, चिंचवड परिसरात २२, हवेली आणि माळीण येथे २०, हडपसर परिसरात १६, तर मगरपट्टा आणि लोहगांव परिसरात ४ मिमी पावसाची नोंद झाली. कोथरूड, बावधन, पाषाण, भुसारी काॅलनी, एनडीए चौक, औंध, बाणेर, सूस, बालेवाडी, पुणे विद्यापीठ परिसर, पुणे-मुंबई महामार्गावरील सर्व्हिस रस्ते, धायरी, नांदेड सिटी परिसर, वारजे, कर्वेनगर, किरकटवाडी, सिंहगड रस्ता, सकाळ नगर, सांगवी या परिसरात धो-धो पाऊस झाला. बावधन, औंध, पाषाण आणि धायरी परिसरात ढगफुटीसदृश्य पाऊस झाला. परिणामी, रस्ते पाण्याखाली गेल्यामुळे वाहतूक मंदावली तर काही मुख्य रस्ते बंद झाले. पावसाने क्षणभर विश्रांती घेतल्यावर पाण्याखाली गेलेले रस्ते कोंडीत अडकले. धायरी परिसरात गुडघाभर पाण्यातून दुचाकी घेवून जाताना नागरिकांना कसरत करावी लागली.पावसाचे पाणी वाहून जाण्यासाठी कोणतीही व्यवस्था नसल्याने रस्त्यांवरून पाण्याचे पाट वाहत होते. शहरात पुढील ४८ तासांसाठी यलो अलर्ट.. शहरासह उपनगरांत पुढील दोन दिवस मेघगर्जना आणि वादळी वाऱ्यासह पाऊस पडण्याचा अंदाज पुणे वेधशाळेने वर्तविला आहे. त्यामुळे दि. १९ आणि २० सप्टेंबर रोजी पुणे शहरासाठी यलो अलर्ट देण्यात आला आहे. क्षेत्रीय कार्यालय क्षेत्रानुसार पाऊस (मीमी).. औंध-बाणेर ८३, कळस-धानोरी ५५, पुणे महापालिका ४०, कसबा २४, खडकवासला २१, वारजे-कर्वेनगर आणि स्मार्ट सिटी आॅफीस परिसर २०, नगर रोड १९, भवानी पेठ १६, ढोले-पाटील रोड १५, कोथरूड १०, वानवडी ७, हडपसर-मुंढवा ६, कोंढवा ४, बिबवेवाडी २, खडकवासलातून पुन्हा विसर्ग… खडकवासला धरणातून बुधवारी दुपारी विसर्ग बंद करण्यात आला होता. मात्र, गुरूवारी संध्याकाळी धरणाच्या परिसरात मुसळधार पाऊस झाल्याने मोठ्या प्रमाणात धरणात पाणी आल्याने धरणातून रात्री आठ वाजता मुठा नदीत पुन्हा १२६३ क्यूसेक पाण्याचा विसर्ग सुरू करण्य़ात आला. पावसाचे प्रमाण वाढल्यास विसर्ग वाढविण्यात येणार असल्याचे पाटबंधारे विभागाकडून सांगण्यात आले.
