पिंपरी : पिंपरीतील तपोवन मंदिर परिसरातील एसबीआय बँकेसमोरील रस्त्यावर मोठ्या प्रमाणात कचरा साचल्याने परिसरात गंभीर आरोग्यसंकट निर्माण झाले आहे. स्थानिक नागरिक आणि व्यावसायिकांकडून खुलेआम कचरा टाकला जात असून, महापालिकेच्या आरोग्य विभागाकडून तो वेळेवर न उचलल्यामुळे ही स्थिती दिवसेंदिवस गंभीर बनत आहे.

सध्या पावसाळ्याचे दिवस सुरू असून, साचलेला कचरा पावसाच्या पाण्यात कुजत आहे. यामुळे परिसरात दुर्गंधी पसरली असून माशा, डासांची उत्पत्ती वाढल्याने विविध साथींच्या रोगांचा धोका निर्माण झाला आहे. नागरिक, विशेषतः महिला, लहान मुले आणि वृद्ध यांना याचा मोठा त्रास सहन करावा लागत आहे.

या रस्त्यावर दिवसभर मोठी वर्दळ असते, मात्र अरुंद रस्त्यावर कचऱ्याचा अडथळा असल्याने वाहनचालकांना वाहतूक कोंडीचा सामना करावा लागत आहे. दुचाकी व चारचाकी वाहनचालक रस्त्याच्या कडेने जाण्याचा प्रयत्न करतात, मात्र कचऱ्यामुळे घसरून अपघात होण्याची शक्यता नाकारता येत नाही.

महापालिकेच्या आरोग्य विभागाने या ठिकाणी वारंवार स्वच्छता करावी, कचरा उचलण्याचे नियमित वेळापत्रक तयार करावे आणि कचरा टाकणाऱ्यांवर दंडात्मक कारवाई करावी, अशी मागणी स्थानिक नागरिक व व्यापाऱ्यांकडून जोर धरत आहे.
स्वच्छता मोहिमा फक्त कागदावर मर्यादित न ठेवता प्रत्यक्षात अमलात आणाव्यात आणि सार्वजनिक आरोग्याचे रक्षण करण्यासाठी महापालिकेने तत्काळ पावले उचलावीत, अशी अपेक्षा व्यक्त केली जात आहे.