Girish Mahajan : राष्ट्रवादी काँग्रेस (शरदचंद्र पवार) पक्षाचे आमदार एकनाथ खडसे यांच्या भाजप प्रवेशाच्या चर्चांनी पुन्हा एकदा महाराष्ट्राच्या राजकारणात जोर धरला आहे. खडसे यांच्या वाढदिवसानिमित्त आयोजित करण्यात आलेल्या भव्य कार्यक्रमात त्यांचा भाजपमध्ये जाहीर प्रवेश होणार असल्याची चर्चा जळगावच्या राजकीय वर्तुळात रंगली आहे. या पार्श्वभूमीवर भाजपचे ज्येष्ठ नेते मंत्री गिरीश महाजन यांनी यावर मिश्किल शैलीत प्रतिक्रिया देत खडसेंना खोचक टोला लगावला.

माध्यमांशी बोलताना गिरीश महाजन म्हणाले,”खडसेंचा भाजप प्रवेश माझ्यामुळे कसा काय रखडणार असा सवाल करत त्यांची थेट दिल्लीपर्यंत हॉटलाईन आहे. मी तर छोटा माणूस आहे, माझी मुंबईपर्यंतही हॉटलाईन नाही. मी माझ्या जळगाव जिल्ह्यापुरताच बरा आहे.”

हेही वाचा : Moshi building collapse : वायसीएमबाहेर आक्रोश… अश्रूंनी भरला परिसर!

पुढे ते म्हणाले, “जर त्यांना वरून ग्रीन सिग्नल मिळाला असेल तर त्यात कोणाची अडचण असण्याचे कारण नाही. मागच्या वेळी ते म्हणाले होते की, गळ्यात रुमाल घालून फोटो काढला, पण तो फोटोच गायब झाला. त्याबाबत मला काही माहिती नाही. मी काही भविष्यकार नाही… मी काय संजय राऊत आहे का?” असा टोला त्यांनी लगावला.

खडसे यांच्या संभाव्य भाजप प्रवेशाबाबत अधिक माहिती गुलाबराव पाटील यांनाच असल्याचे सांगत महाजन म्हणाले, “या विषयावर गुलाबभाऊ जास्त माहिती देऊ शकतील. गेल्या आठ दिवसांपासून मी पाऊस, पूर, दरड कोसळणे आणि पाण्यामुळे बाधित झालेल्या भागांच्या पाहणीत व्यस्त होतो. त्यामुळे या चर्चांबाबत मला फारशी माहिती नाही.”

नाथाभाऊ मोठे नेते आहेत : महाजन

एकनाथ खडसे यांच्या वाढदिवसानिमित्त आयोजित करण्यात आलेल्या भव्य कार्यक्रमाबाबत बोलताना महाजन म्हणाले, “नाथाभाऊ मोठे नेते आहेत. त्यांचा वाढदिवसही मोठ्या उत्साहात साजरा होईल. दिल्लीपासून अनेक मान्यवर उपस्थित राहतील. त्यांना वाढदिवसाच्या शुभेच्छा. मात्र, आम्हाला अद्याप कोणतेही निमंत्रण आलेले नाही. निमंत्रण मिळाल्यानंतर त्याबाबत विचार करू,” असेही त्यांनी स्पष्ट केले.

विनोद तावडेंनी घेतली होती भेट

गेल्या काही दिवसांपूर्वी एकनाथ खडसे यांच्या निवासस्थानी जाऊन भाजपचे ज्येष्ठ नेते राज्यसभा खासदार विनोद तावडे यांनी भेट घेतली होती. या भेटीनंतर खडसेंच्या भाजप प्रवेशाच्या चर्चा रंगल्या आहेत. त्यामुळे एकनाथ खडसे वाढदिवसाच्या दिवशी मोठा निर्णय घेणार का याकडे आता अनेकांचे लक्ष लागलेले आहे.

हेही वाचा : Pune District : फिर्यादी, स्वच्छता निरीक्षकांचीच कसून चौकशी करा; शिरूरमधील पाइप चोरीप्रकरणी बांडे यांची मागणी