पुणे – पश्चिम महाराष्ट्रातील इंदापूर मतदारसंघातील भाजप नेते हर्षवर्धन पाटील भाजपची साथ सोडून शरद पवार गटात प्रवेश करणार असल्याच्या राजकीय वर्तुळात जोरदार चर्चा सुरु आहेत. अशातच आज त्यांनी सिल्वर ओक या निवास्थानी शरद पवारांची भेट घेतली. जवळपास 1 तास या दोन्ही नेत्यांमध्ये चर्चा झाली. पक्ष प्रवेश निश्चित मानला जात असून उद्या शुक्रवारी (दि. 4) हर्षवर्धन पाटील पत्रकार परिषद घेऊन मोठी घोषणा करणार असल्याची माहितीही समोर येत आहे. पश्चिम महाराष्ट्रातील बडा नेता शरद पवार गटात प्रवेश करत असल्याने भाजपसाठी हा मोठा धक्का मानला जात आहे. (Harshvardhan Patil)

याआधी समरजितसिंह घाटगे यांनी शरद पवारांच्या राष्ट्रवादीत प्रवेश केला. तर लोकसभेला सोलापूरमधून मोहिते पाटील यांनी भाजपची साथ सोडली. त्यानंतर आता हर्षवर्धन पाटील पक्ष सोडणार असल्यामुळे पश्चिम महाराष्ट्रात भाजपला मोठे धक्के बसत आहेत.

दरम्यान, महायुतीत इंदापूरची जागा अजित पवारांच्या राष्ट्रवादीला मिळण्याची शक्यता आहे. त्यामुळे मागील 5 वर्ष या मतदारसंघात तयारी करणाऱ्या हर्षवर्धन पाटील यांनी दुसरा पर्याय शोधला आहे. हर्षवर्धन पाटील हे पवारांच्या राष्ट्रवादीत जातील अशी चर्चा गेल्या महिनाभरापासून सुरु होती. त्यात आज सिल्व्हर ओकवर झालेल्या भेटीनंतर त्यांचा पक्षप्रवेश निश्चित मानला जात आहे. पक्ष प्रवेशानंतर इंदापूरात हर्षवर्धन पाटील तुतारी चिन्हावर शरद पवार यांच्या गटाकडून उमेदवार म्हणून विधानसभा निवडणुक लढवणार असल्याची माहिती समोर आली आहे.

सध्या इंदापूर मतदारसंघात दत्तात्रय भरणे विद्यमान आमदार आहेत. ते अजित पवारांच्या राष्ट्रवादीसोबत आहेत. महायुतीत ज्याचा आमदार त्या पक्षाला ती जागा सोडण्याचा फॉर्म्युला ठरवण्यात आला आहे. त्यामुळे इंदापूरची जागा अजित पवारांच्या वाट्याला जाणार आहे. त्यामुळे हर्षवर्धन पाटील नाराज होते. लोकसभा निवडणुकीत हर्षवर्धन पाटील यांनी त्यांच्या कार्यकर्त्यांसह सागर बंगल्यावर जाऊन देवेंद्र फडणवीसांची भेट घेतली होती. लोकसभेवेळीच विधानसभेचा शब्द द्या अशी भूमिका तेव्हा हर्षवर्धन पाटील यांच्या समर्थकांकडून घेतली जात होती. स्वत: फडणवीस यांनी इंदापूरात जात कार्यकर्त्यांचा मेळावा घेतला होता. मात्र विधानसभेला तिकीट मिळणार नाही हे लक्षात येताच हर्षवर्धन पाटील यांनी दुसऱ्या पक्षात जाण्याचा मार्ग स्वीकारला.

कार्यकर्त्यांकडून तुतारी चिन्हावर लढण्याचा आग्रह –

गेल्या काही दिवसांपासून हर्षवर्धन पाटील हे मतदारसंघात गाठीभेटी आणि विविध कार्यक्रमांना हजेरी लावत होते. कुठल्याही परिस्थितीत विधानसभा निवडणूक लढायचीच असा चंग हर्षवर्धन पाटील यांनी बांधला आहे. त्यात कार्यकर्त्यांकडून शरद पवारांच्या राष्ट्रवादीची तुतारी हाती घ्या असा आग्रह धरण्यात येत होता.

कार्यकर्त्यांकडून पोस्टर व्हायरल –

हर्षवर्धन पाटील आणि त्यांच्या कन्या अंकिता पाटील यांनी शरद पवारांच्या मुंबईतील निवासस्थानी त्यांची भेट घेतली. तसेच अंकिता पाटील यांच्या व्हाट्सअप प्रोफाईलवर तूतारीच चिन्ह पहायला मिळालं. हर्षवर्धन पाटील यांच्या कार्यकर्त्यांकडून एक पोस्टर तयार करण्यात आले असून हर्षवर्धन पाटील आणि तुतारी चिन्ह त्यात आहे. ते सध्या कार्यकर्त्यांच्या ग्रुपवर व्हायरल होत आहे. त्यामुळे त्यांचा राष्ट्रवादी काॅंग्रेस शरद पवार पक्षात प्रवेश निश्चित आहे.

2019 मध्ये पराभव –

हर्षवर्धन पाटील हे पश्चिम महाराष्ट्रातील बडे नेते आहेत. त्यांनी अनेक मंत्रीपदं भूषविली आहेत. 1995 ते 2014 पर्यंत ते मंत्री होते. हर्षवर्धन पाटील यांनी 2019 ची विधानसभा निवडणूक भाजपकडून लढवली होती. तर राष्ट्रवादी काँग्रेस पक्षाने दत्तात्रय भरणे यांना त्यांच्याविरोधात मैदानात उतरवले होते. या निवडणुकीत हर्षवर्धन पाटील यांचा पराभव झाला होता. दत्तात्रय भरणे यांनी 114,960 मतं खेचून आणली होती. तर हर्षवर्धन पाटलांना 111,850 मतं पडली होती. त्यामुळे हर्षवर्धन पाटलांचा 3,110 मतांनी पराभव झाला होता. त्यानंतर हर्षवर्धन पाटील आणि भरणे यांच्यामधील संघर्ष गेल्या 5 वर्षात वाढला आहे. इंदापूरमधील नेत्यांचे कार्यकर्ते मला त्रास देतात, अशा आशयाचे पत्र हर्षवर्धन पाटील यांनी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांना लिहिले होते.