सांगली – जिल्ह्यातील वाळवा तालुक्यातील तांदुळवाडी येथील 35 वर्षीय कंत्राटदार हर्षल पाटील यांनी जलजीवन मिशन योजनेअंतर्गत काम केल्यानंतरही 1.4 कोटी रुपयांचे थकित बिल मिळाले नसल्याने आर्थिक तणावातून शेतात गळफास घेऊन आत्महत्या केली. या घटनेने महाराष्ट्रात संतापाची लाट उसळली आहे. हर्षल आणि त्यांचे बंधू अक्षय पाटील यांनी तांदुळवाडीतील जलजीवन मिशनचे काम केल्याचे पाहणीतून सिद्ध झाले आहे. योजनेच्या भूमिपूजन आणि शुभारंभाच्या फलकांवर या दोघांचीच नावे आहेत. मात्र, राज्य सरकार आणि सांगली जिल्हा परिषदेने हर्षल यांनी योजनेअंतर्गत कोणतेही काम केले नसल्याचा दावा करत दिशाभूल करण्याचा प्रयत्न केला आहे, असा आरोप विरोधकांनी केला. मंत्री गुलाबराव पाटील यांनी हर्षल कंत्राटदार नव्हतेच, असे वक्तव्य केले, ज्यावर प्रश्नचिन्ह उपस्थित झाले आहेत. महाराष्ट्रातील कंत्राटदार संघटनांनी सरकारवर तीव्र टीका केली आहे. राज्यात 90,000 कोटींची थकबाकी असून, कंत्राटदारांना न्यायासाठी न्यायालयाचा दरवाजा ठोठावावा लागला आहे. विरोधी पक्षनेते जयंत पाटील, संजय राऊत आणि जितेंद्र आव्हाड यांनी सरकारच्या निष्क्रियतेवर टीका करत हर्षलच्या मृत्यूला प्रशासकीय अपयश ठरवले. कंत्राटदार संघटनेने सरकारच्या असंवेदनशील वृत्तीवर संताप व्यक्त करत, “सत्ता आहे म्हणून काहीही बोलाल, पण काळ माफ करणार नाही,” असे म्हटले आहे. हर्षलच्या आत्महत्येने कंत्राटदारांच्या आर्थिक संकटावर प्रकाश टाकला असून, सरकारने तातडीने उपाययोजना करण्याची मागणी जोर धरत आहे.
