BJP Leader : भारतीय जनता पक्षाचे ज्येष्ठ नेते आणि माजी मंत्री हरिनारायण राजभर यांचे रविवारी निधन झाले. ते ७६ वर्षांचे होते. श्वास घेण्यास त्रास होत असल्याने त्यांना शनिवारी रात्री लखनऊ येथील रुग्णालयात दाखल करण्यात आले होते, उपचारादरम्यान त्यांची प्राणज्योत मालवली. (BJP Leader) राजभर यांच्या पश्चात पत्नी, तीन मुलगे आणि पाच मुली असा मोठा परिवार आहे. त्यांचा जन्म बलिया जिल्ह्यातील तंगुनिया गावात झाला होता. त्यांनी आपल्या राजकीय कारकिर्दीत महत्त्वपूर्ण कामगिरी करत १९९१ आणि १९९६ मध्ये सियार विधानसभा मतदारसंघातून विजय मिळवला होता. त्या वेळी त्यांनी समाजवादी पक्षाचे नेते शारदानंद आंचल यांचा पराभव केला होता. (BJP Leader) तसेच २०१४ च्या लोकसभा निवडणुकीत ते मऊ जिल्ह्यातील घोसी मतदारसंघातून खासदार म्हणून निवडून आले होते. आमदार म्हणून कार्य करताना त्यांनी कल्याण सिंह, राम प्रकाश गुप्ता आणि राजनाथ सिंह यांच्या नेतृत्वाखालील सरकारमध्ये राज्यमंत्री म्हणूनही काम पाहिले. त्यांच्या निधनामुळे भाजपसह संपूर्ण राजकीय वर्तुळात शोककळा पसरली असून अनेक नेत्यांनी त्यांना श्रद्धांजली अर्पण केली आहे. (BJP Leader)
