Student Safety : जंक्शन ते डाळज क्रमांक दोन रस्त्यावरील श्री हरणेश्वर विद्यालयासमोरील गतिरोधक तुटल्याने विद्यार्थ्यांच्या सुरक्षिततेचा प्रश्न निर्माण झाला आहे. भरधाव वाहनांमुळे या ठिकाणी अपघाताचा धोका वाढला असून, संबंधित ठेकेदाराच्या दुर्लक्षाबद्दल नागरिकांमध्ये संताप व्यक्त होत आहे.

जंक्शन ते डाळज क्रमांक दोन हा परिसरातील महत्त्वाचा मार्ग असून, या रस्त्यावरून दररोज दुचाकी, चारचाकी तसेच अवजड वाहनांची मोठी वर्दळ असते. रस्त्याचे नवीन काम झाल्यानंतर वाहनांचा वेग वाढला आहे. त्यातच गतिरोधक तुटल्याने वाहनांच्या वेगावर नियंत्रण ठेवणे कठीण होत असून, अपघाताची शक्यता वाढली आहे.

रस्त्यालगत असलेल्या श्री हरणेश्वर विद्यालयातील विद्यार्थ्यांना दररोज शाळेत ये-जा करताना हा रस्ता ओलांडावा लागतो. त्यामुळे भरधाव वाहनांमुळे विद्यार्थ्यांच्या जीविताला धोका निर्माण झाला आहे. गतिरोधकाची तातडीने दुरुस्ती करावी, अशी मागणी नागरिकांकडून होत आहे.

यासंदर्भात संबंधित यंत्रणा आणि ठेकेदाराकडे वारंवार मागणी करूनही अद्याप ठोस कार्यवाही झालेली नाही. नवीन रस्ता झाल्यानंतर काही काळातच गतिरोधक तुटल्याने रस्त्याच्या कामाच्या गुणवत्तेबाबतही नागरिकांकडून प्रश्न उपस्थित केले जात आहेत.