Hair Straightener Side Effects: आजच्या आधुनिक जीवनशैलीत बाह्य व्यक्तिमत्त्वाला खूप महत्त्व दिलं जातं. त्यामुळे कपडे, मेकअप यांसोबतच हेअरस्टाईलवरही मुली व महिला विशेष लक्ष देतात. सरळ, मऊ व सिल्की केसांचा ट्रेंड कायम असतो. हा लुक मिळवण्यासाठी अनेकजणी नियमितपणे हेअर स्ट्रेटनरचा वापर करतात.

स्ट्रेटनरच्या साहाय्याने काही मिनिटांत केस सरळ होतात आणि आकर्षक लुक मिळतो. पण हा फक्त तात्पुरता फायदा असतो. सतत किंवा रोज स्ट्रेटनर वापरल्याने केसांची गुणवत्ता खराब होते आणि दीर्घकाळात गंभीर दुष्परिणाम दिसू लागतात.

सतत स्ट्रेटनर वापरल्याचे नुकसान

1. केस कोरडे आणि बेजान होतात

स्ट्रेटनरमध्ये वापरली जाणारी तीव्र उष्णता केसातील नैसर्गिक ओलावा काढून टाकते. त्यामुळे केस कोरडे, राठ व बेजान दिसू लागतात. चमक कमी होते आणि केस स्पर्शालाही खरखरीत वाटतात.

2. केस गळती व फाटलेली टोकं

रोज स्ट्रेटनर वापरल्याने केसांच्या मुळांवर ताण येतो. मुळे कमजोर झाल्याने केस गळती वाढते. याचबरोबर स्प्लिट एंड्स म्हणजेच फाटलेली टोकं वाढतात. अशा केसांना व्यवस्थित ठेवणं कठीण होतं.

3. टाळूवर नकारात्मक परिणाम

स्ट्रेटनरचा वापर केवळ केसांवरच नव्हे तर टाळूवरसुद्धा होतो. वारंवार उष्णतेमुळे टाळू कोरडी पडते. यामुळे कोंडा, खाज, जळजळ यासारख्या समस्या उद्भवू शकतात. कधी कधी ही अडचण एवढी वाढते की डॉक्टरांचा सल्ला घ्यावा लागतो.

4. केसांचा रंग लवकर फिका होतो

ज्यांनी केसांना रंग (डाई) लावलेले असतात त्यांच्यासाठी स्ट्रेटनर आणखी हानिकारक ठरतो. वारंवार उष्णतेमुळे रंग लवकर फिका होतो आणि केसांची नैसर्गिक रचना बिघडते. केसांची चमक आणि सौंदर्य दोन्ही कमी होते.

5. दीर्घकालीन परिणाम

सतत स्ट्रेटनिंग केल्याने केसांचा तुटण्याचा दर वाढतो, केसांची घनता कमी होते. काही प्रकरणांत केस वाढण्याची गतीही मंदावते. यामुळे भविष्यात टक्कल पडण्याची भीती निर्माण होते.

बचावासाठी काय कराल?

-स्ट्रेटनर वापरण्यापूर्वी नेहमी हीट प्रोटेक्टंट स्प्रे लावा.

-केसांची आर्द्रता टिकवण्यासाठी आठवड्यातून दोनदा डीप कंडिशनिंग करा.

-केस धुतल्यानंतर शक्यतो नैसर्गिकरित्या वाळू द्या, ड्रायरचा वापर कमी करा.

-रोज स्ट्रेटनर वापरण्याऐवजी आठवड्यातून फक्त १-२ वेळाच वापरा.

-केसांची नैसर्गिक रचना जपण्याचा प्रयत्न करा आणि केमिकल ट्रीटमेंटपासून दूर राहा.

एकंदरीत, हेअर स्ट्रेटनर तात्पुरता आकर्षक लुक देतो; पण सततचा वापर केल्यास केस आणि टाळू दोन्हींच्या आरोग्यावर गंभीर परिणाम होतो. त्यामुळे तो मर्यादित प्रमाणात वापरणं आणि केसांची नैसर्गिक देखभाल करणं अत्यंत गरजेचं आहे.