मुंबई : राज्यात सध्या विविध जिल्ह्यात तापमानाचा पारा चांगलाच घसरत आहे. कमाल तापमानात घट झाल्यामुळे हुहहुडी चांगलीच वाढली आहे. मुंबईत यंदाच्या हिवाळ्यातील सर्वात कमी तापमानाची नोंद झाली आहे.  याचबरोबर मराठवाड्यासह विदर्भ पश्चिम महाराष्ट्रात तापमानात घट झाल्याने  गारठा चांगलाच वाढला आहे.

. मराठवाड्यात किमान तापमानात चांगलीच घट झाली आहे. तिथे नागरिकांनी थंडीपासून बचावासाठी शेकोट्या पेटवल्याचे  चित्र दिसत आहे. तर दुसरीकडं पश्चिम महाराष्ट्रातील पुणे, सोलापूर, सातारा या जिल्ह्यातही तापमानात घट झाली आहे. धुळे जिल्ह्यातही तापमानात मोठी घट झाली आहे. त्यामुळे तिथे कडाक्याची थंडी पडली आहे. धुळे शहरासह जिल्ह्याचे 10 अंशापर्यंत आलेले तापमान आज 8.4 वर आलं आहे. त्यामुळं ठिकठिकाणी शेकोट्या पेटल्या आहेत. वाढत्या कडाक्याच्या थंडीमुळं सकाळी मॉर्निंग वॉकसाठी बाहेर पडणाऱ्या नागरिकांची संख्या कमी झाली आहे.

परभणी जिल्ह्यातही कडाक्याची थंडी पडली आहे. त्यामुळे ठिकठिकाणी शेकोट्या पेटलेल्या दिसत आहेत. गेल्या आठवड्यात गायब झालेल्या थंडीचे पुनरागमन झाले आहे. गेल्या चार दिवसांपासून परभणीत थंडीचा कडाका कायम आहे. सलग तीन दिवस परभणीचे तापमान हे 10 अंशावर होते. तर आज हे तापमान 11 अंशावर गेले आहे. त्यामुळे जिल्हाभरात चांगलीच थंडी पडत असून हवेत कमालीचा गारवा निर्माण झाला आहे. या थंडीमुळे ग्रामीण भागासह शहरात शेकोट्या पेटत असून नागरिक उबदार कपड्यांचा वापर करताना दिसत आहेत.

दरम्यान, मुंबईत यंदाच्या हिवाळ्यातील सर्वात कमी तापमानाची नोंद झाली आहे. कुलाब्यात देखील यंदाच्या मौसमात पहिल्यांदाच किमान तापमान 20 अंशाखाली गेले आहे. उद्या देखील मुंबईतील किमान तापमानात आणखी घट होण्याचा अंदाज मुंबई प्रादेशिक हवामान केंद्रानं व्यक्त केला आहे. ख्रिसमसनंतर म्हणजे 25 डिसेंबरनंतर मुंबईत थंडी वाढणार असल्याचा अंदाज हवामान विभागाने  वर्तवला होता