वाघापूर : महाराष्ट्र शासनाच्या वतीने राबविण्यात येणाऱ्या मुख्यमंत्री समृद्ध पंचायत राज अभियान २०२५-२६ अंतर्गत पुरंदर तालुक्यातील गुरोळी ग्रामपंचायतीने उल्लेखनीय कामगिरी करत जिल्हास्तरावर प्रथम क्रमांक मिळवण्याचा मान पटकावला आहे. या यशामुळे गुरोळी गावाला जिल्हास्तरीय उत्कृष्ट ग्रामपंचायत पुरस्कार जाहीर झाला असून, गावाला तब्बल ५० लाख रुपयांची पुरस्कार रक्कम मिळणार आहे. गुरोळी गावाच्या विकासाच्या दृष्टीने ही अत्यंत अभिमानास्पद आणि ऐतिहासिक कामगिरी मानली जात आहे.

मुख्यमंत्री समृद्ध पंचायत राज अभियान ही केवळ ग्रामपंचायतींची स्पर्धा नसून गावाचा सर्वांगीण विकास, स्वच्छता, पर्यावरण संवर्धन, लोकसहभाग, महिला सक्षमीकरण, शासकीय योजनांची प्रभावी अंमलबजावणी आणि लोकाभिमुख प्रशासन या विविध निकषांवर गावाची प्रगती तपासणारी महत्त्वपूर्ण स्पर्धा आहे. या स्पर्धेत गुरोळी गावाने लोकसहभागाच्या बळावर आपली वेगळी ओळख निर्माण केली. उपजिल्हाधिकारी प्रशांत खेडेकर यांचे मार्गदर्शन आणि योगदान महत्त्वपूर्ण ठरले.

या यशाबद्दल प्रशांत खेडेकर यांनी समाधान व्यक्त करताना सांगितले की, मुख्यमंत्री समृद्ध पंचायत राज अभियानाच्या माध्यमातून गुरोळी गावातील सर्व नागरिक, महिला आणि तरुणांनी एकजुटीने सहभाग नोंदवला. प्रत्येकाने गावाच्या विकासासाठी आपले योगदान दिले. या स्पर्धेच्या निमित्ताने गावामध्ये जो सकारात्मक बदल घडून आला आहे, तो केवळ स्पर्धेपुरता मर्यादित न राहता कायमस्वरूपी टिकवून ठेवणे ही आपली सर्वांची जबाबदारी आहे.

महिलांचा विशेष पुढाकार

या स्पर्धेमध्ये गुरोळी गावातील महिलांनी विशेष पुढाकार घेतला. गावातील स्वच्छता, सामाजिक उपक्रम, जनजागृती आणि विकासकामांमध्ये महिलांचा सक्रिय सहभाग दिसून आला. त्याचबरोबर गावातील तरुणांनीही उत्साहाने सहभाग घेत विविध उपक्रमांमध्ये महत्त्वाची भूमिका बजावली. ज्येष्ठ नागरिकांपासून लहान मुलांपर्यंत सर्वांनी गावाच्या प्रगतीसाठी योगदान दिले. त्यामुळे ही स्पर्धा केवळ पुरस्कार मिळवण्यापुरती मर्यादित न राहता गावामध्ये सकारात्मक बदल घडवून आणणारी चळवळ ठरली.

राज्यस्तरावर प्रथम क्रमांक मिळवण्याचा संकल्प

गावातील सर्व नागरिकांनी अशीच एकजूट आणि सहकार्य कायम ठेवून आगामी स्पर्धांमध्येही उत्स्फूर्त सहभाग नोंदवावा. जिल्हास्तरावर प्रथम क्रमांक मिळवला आहे, आता भविष्यात राज्यस्तरावरही गुरोळी गावाचा प्रथम क्रमांक यावा, यासाठी सर्वांनी एकत्रित प्रयत्न करावेत, अशी अपेक्षाही व्यक्त केली जात आहे. गावातील प्रत्येक नागरिकाने विकासाची जबाबदारी स्वीकारली, तर गावाचा चेहरामोहरा बदलू शकतो, हे गुरोळीने आपल्या कृतीतून दाखवून दिले आहे. एकजूट, लोकसहभाग आणि विकासाची दूरदृष्टी यांच्या जोरावर गुरोळीने जिल्ह्यात प्रथम क्रमांक मिळवत संपूर्ण पुरंदर तालुक्याचा मान उंचावला आहे.