मुंबई : राज्यात महाविकास आघाडीचे सरकार असले तरी या सरकारमधील पक्षांतर्गत नेत्यांकडून अनेकवेळा परस्परांवर आरोप प्रत्यारोप केल्याचे पाहायला मिळाले आहे. याच वादात राष्ट्रवादी काँग्रेसचे नेते एकनाथ खडसे आणि शिवसेना नेते गुलाबराव पाटील यांच्यातही गेल्या काही दिवसांपासून वाद रंगत असून दोघांमध्ये शाब्दिक चकमक सुरु आहेत. नुकतेच गुलाबराव पाटील यांनी एकनाथ खडसेंना जाहीर आव्हानच दिले आहे. एकनाथ खडसेंनी जळगाव जिल्ह्यातील नशिराबाद येथे मी मुख्यमंत्रीपदाचा दावेदार असल्यामुळे माझ्यावर अन्याय झाल्याचे म्हटले होते. तसेच यावेळी गुलाबराव पाटलांवर निशाणा साधला होता. त्यांच्या यी टीकेला गुलाबराव पाटील यांनी नशिराबाद येथील कार्यक्रमात नाव न घेता अप्रत्यक्षपणे उत्तर दिलं आहे. “काही लोक माझ्याविषयी नशिराबाद येथे बोलून गेले मात्र ते लपून लढाई करतात. त्यांनी कडाला कडं लावून बोलावं, चारीमुंड्या चीत करून हा पाटील नावाचा नाही निघाला तर गुलाबराव नाव लावणार नाही,” असे आव्हानच गुलाबराव पाटील यांनी मंचावरुन बोलताना दिले. पण ते छोटी लढाई करतात, पण आपण जाहीरवाले आहोत असा टोला यावेळी त्यांनी लगावला. “आमच्या वडिलोपार्जित कोणी राजकारणात नव्हते. मात्र छत्रपती शिवाजी महाराजांच्या नावाने शिस्तबद्ध, वचनबद्ध सेवाभावी व नामर्दांना स्थान नसलेली संघटना शिवसेना आली व त्यात मी सहभागी झालो, आमदार, खासदार होऊ असा विचार कधी स्वप्नातही नव्हता. आता काही लोक मिरवतात, त्यांनी मिरवावं. त्यांना जे जमलं नाही ते मी जमवण्याचा प्रयत्न करत आहे. त्यामुळे ते माझ्यावर व्यक्तिगत टीका करायला लागले आहेत,” अशी टीका यावेळी त्यांनी केली. “शिवाजी महाराजांच्या सैन्यात गद्दारांना जागा नव्हती, कडेलोट करायचे. त्या राजांच्या विचारावर चालणारे आपण आहोत. बोलण्यात मी किती फाटेतोंडाचा आहे हे तुम्हाला माहिती आहे. मी काही फार सुसंस्कृत, शिकलेलो नाही. पण मला जे कळतं ते तुम्हाला कळतं का माहिती नाही. माझ्यावर अत्यंत वैयक्तिक टीका केली जात आहे. पण जिल्ह्याचा पालकमंत्री असताना माझ्यात कधीही मी पणा आला नाही. सर्वांना घेऊन विकासाची रथयात्रा काढण्याचा प्रयत्न करत असून भविष्यातही करत राहीन,” असे गुलाबराव पाटील यांनी यावेळी सांगितले.
