Moshi Accident : मोशी दुर्घटनेच्या दुसऱ्या दिवशी सुरू असलेल्या बचावकार्यादरम्यान आम्ही पहिल्या मजल्यापर्यंत पोहचू शकलो आहे. अजून पार्किंगपर्यंत पोहचायचं आहे. कोसळलेल्या इमारतीचा भाग, त्यामध्ये कचऱ्याचा मलबा, त्यातून विषारी वायू आणि तयार होणारी प्रचंड उष्णता हे मोठ आव्हान आहे.

तर दुसरीकडे कचरा काढला तर इमारत कोसळत आहे आणि नाही काढला तर अडकलेल्यांपर्यंत पोहचता येत नाही असे अडथळे समोर आहेत. मोशी कचरा डेपो दुर्घटनेत बचावकार्य करणाऱ्या अग्निशमक दल, सैन्यदल आणि एनडीआरएफच्या जवानांसमोर आव्हाने आणि अडथळे आहेत.

या अडथळ्यांशी दोन हात करत कशा पद्धतीने अडकलेल्यांना बाहेर काढले याबाबत महापालिकेच्या अग्निशामक विभागातील अधिकारी ऋषिकांत चिपाडे यांनी माहिती दिली.

बुधवारी दुपारी मोशी कचरा डेपोमध्ये तळमजला अधिक दोन मजली इमारतीवर कचऱ्याचा भलामोठा डोंगर कोसळला. पाठीमागे जो दीडेशे ते दोनशे फूट उंंच डोंगर होता तो थेट टेरेसवर कोसळला. वरून मलब्याचा मारा इतका जोरात होता की भिंती फोडून तो मलबा इमारतीमध्ये घुसला.

दोन मजल्यापर्यंत हा मलबा आहे. दुपारच्या वेळी जेवणासाठी कर्मचारी कँटिंगमध्ये आले होते. त्यांना बाहेर पडण्याची कोणतीच संधी मिळाली नाही. डोंगराचे भूस्खलन झाले तर आवाज येतो. डोंगर कोसळण्यापूर्वी माती पडणे, आवाज येणे अशी लक्षणे दिसतात. यामध्ये तसे काहीच जाणवले नाही.

कचऱ्यामध्ये हलका लेअरिंग असल्यामुळे काहीही आवाज न होता हा मलबा सरळ इमारतीवर कोसळला. दुसऱ्या मजल्यावर जे होते त्यांना बाहेरचं दिसत होतं. त्यांनी काचा फोडून बाहेर पडणे शक्य झालं. मात्र, बाकीचे लोक त्यामध्ये अडकले.

जिन्यामध्ये देखील कचऱ्याचा मलबा असल्यामुळे आतमध्ये जाणे शक्य होत नाही. आम्ही सुरूवातीला इमारतीच्या बाजूने आतमध्ये जाण्याचा प्रयत्न केला. त्यासाठी कोअर कट घेतला मात्र, त्यावेळी लक्षात आल की आतमध्ये काहीच जागा नाही. इमारतीच्या छतावर पीओपी केलेल होत तेवढीच जागा आतमध्ये जाण्यास दिसत होती.

त्या जागेमधून आत जाण्यासाठी एअर बॅग फुलवत जागा केली. त्यानंतर ऑपरेशन सुरू झालं. स्लॅब १० ते १२ इंचाचा असल्याने पूर्वी कोअर कट करायला खूप उशिर लागला. त्यासाठीच सायंकाळचे सात वाजले.

घटनेच्या पाच तासानंतर आत गेल्यानंतर परिस्थिती खूप भयानक होती. सर्वत्र कचऱ्याचा मलबा पसरला होता. तो अवतीभोवती प्रचंड उष्णता तयार करतो. तसेच मिथेन वायूसारखे अनेक वायू त्याठिकाणी तयार झाले होते. त्यामुळे त्यांना श्‍वास घेण्यास अडचण होत होती.

सुरूवातीला आतील विषारी वायू बाहेर काढत त्यांना ऑक्सिजन देण्यासाठी काम केल. इमारतीचे स्ट्रक्चर तोडण शक्य नव्हतं. मात्र, कचरा दाबणे शक्य होत. त्यामुळे एअर बॅग फुलवत त्याठिकाणी वाट करण्यात आली. त्याठिकाणी असलेल्या टेबल, डायनिंग यामध्ये ते अडकलेले होते. त्यामुळे या वस्तू बाजूला करण्यात जास्त वेळ गेला. त्यानंतर सहा जणांना बाहेर काढलं.

मध्यरात्री तिघांना बाहेर काढलं
एका ठिकाणी पीओपीची काही जागा होती. तर बीम पडलेला आहे त्याखाली काही जागा होती. मात्र, त्या बीमच्या खाली कचरा साचला होता.

मातीचा कचरा असता तर तो उकरून काढणे शक्य आहे. मात्र, हा प्लास्टिक कचरा असल्याने तो ताणला जात होता. त्यामुळे त्यामधून जागा करणे खूप मुश्‍किल होत. दुसरीकडे त्यांची क्षमता संपली होती. त्यांना काही जखमा झाल्या होत्या. परिणामी, त्यांचा काहीच प्रतिसाद मिळत नव्हता. अशा अवस्थेत मध्यरात्री तिघांना बाहेर काढल.

रात्री दोन वाजता सर्व आवाज बंद
जोपर्यंत आवाज मिळत होता. तोपर्यंत ऑपरेशनला दिशा मिळत होती. मात्र रात्री दोन वाजता सगळे आवाज बंद झाले. अशावेळी तपासाची दिशा ठरविण्यासाठी साउंड व्हायब्रेशन टेस्ट घेतली. आपल्या जवळ कोणी आहे. मात्र फक्त आवाज येत नाही.

त्यामुळे त्याला काढता आले नाही असे नको व्हायला म्हणून ही टेस्ट घेतली. एकावेळी दहा डिव्हाईस लावून त्याची टेस्ट घेण्यात आली. त्यामध्ये थोडीजरी हालचाल झाली तरी लगेच लक्षणे दाखवत. तीनवेळा आपण ही टेस्ट घेतली. मात्र एकदाही लक्षण न दिसल्यामुळे पुढे कार्यवाही करता आली नाही.

इकडे आड तिकडे विहीर
दुसऱ्यादिवशी बोअरवेल सारखा होल करून आतमध्ये जाण्याचा प्रयत्न केला. मात्र, खोदकाम केल्यानंतर लक्षात आल की तळमजल्याचा बीम कोसळलेला आहे. त्यामुळे प्रवेश करणे शक्यच नाही. इमारतीमधील कचरा काढल्याशिवाय अडकलेल्यांपर्यंत पोहचता येत नाही आणि कचरा काढला तर इमारतीचे स्ट्रक्चर कोसळत आहे.

त्यामुळे इकडे आड आणि तिकडे विहीर अशी अवस्था झाली आहे. गुरूवारी दुपारपर्यंत पहिल्या मजल्यापर्यंत देखील पोहचलो नाही. अजून पार्किंग बाकी आहे. या बचावकार्याला किती वेळ लागेल हे काहीच सांगता येणार नाही, असे सांगत ऋषिकांत चिपाडे यांनी बचावकार्यातील अडथळे आणि आव्हाने सांगितली.

Kamshet : पर्यटकांकडून खंडणी प्रकरणी आरोपींना १३ जुलैपर्यंत पोलीस कोठडी