Gopichand Padalkar : भाजप आमदार गोपीचंद पडळकर यांची पुन्हा एकदा टीका करताना जीभ घसरली आहे. त्यांनी राष्ट्रवादी काँग्रेस शरदचंद्र पवार पक्षातील एका आमदारावर अत्यंत खालच्या शब्दांत टीका केली आहे. पक्षाचे माजी प्रदेशाध्यक्ष आणि आमदार जयंत पाटील यांच्यावर टीका करताना पडळकरांनी त्यांचा एकेरी उल्लेख केला आहे. तसेच त्यांच्या वडिलांचा उल्लेख करत पातळी सोडून अत्यंंत खालच्या शब्दांत टीका केली आहे. यामुळे त्यांनी केलेल्या विधानामुळे ते पुन्हा एकदा वादाच्या भोवऱ्यात सापडले आहेत. यावर आता राष्ट्रवादी काँग्रेस पक्षाचे अध्यक्ष आणि राज्याचे उपमुख्यमंत्री अजित पवार यांनी प्रतिक्रिया दिली आहे. राजकारणात कोणालाही वेदना देणारे वक्तव्य करू नये, असा सल्ला अजित पवार यांनी गोपीचंद पडळकर यांचे नाव न घेता दिला आहे. नेमकं काय म्हणाले गोपीचंद पडळकर? माणसं पाठवली. कशासाठी? गोपीचंद पडळकरने कुठल्या व्यापाऱ्याकडून पैसे घेतले का? घ्या एखादा मधला व्यापारी घ्या आणि त्याच्यावर खंडणीचा गुन्हा दाखल करा. अरे जयंत पाटला तुझ्या सारखा भिकारी अवलाद गोपीचंद पडळकरची नाही. माझ्यात कार्यक्रम करायची ती धमक आहे. तुझ्यासारखी ती अवलाद नाही. एवढ्या खालच्या लेव्हलला? आता माझा दांडीयाचा कार्यक्रम आहे. ये बघायला. तुझे डोळे दिपून जातील कार्यक्रम बघून, असं म्हणत जयंत पाटील यांचा एकेरी उल्लेख पडळकरांनी केला आहे. याशिवाय जयंत पाटील यांच्या वडिलांचा उल्लेख करत अत्यंत खालाच्या शब्दांत टीका केली आहे. अजित पवार काय म्हणाले? पडळकरांच्या वक्तव्याने राजकीय वर्तुळात पडसाद उमटल्याचे पाहायला मिळत आहे. अजित पवार यांनी गोपीचंद पडळकर यांचं नाव न घेता त्यांना कुणीही कोणत्याही पक्षाचे असो, पण राजकारणात वावरताना सुसंकृतपणा दाखवायला हवा. प्रत्येकाने बोलत असताना कुणाला वेदना देणारे वक्तव्य करू नये असा दिला आहे. हेही वाचा : रशियामध्ये ७.८ रिश्टर स्केल तीव्रतेच्या भूकंपाने हाहाकार ; त्सुनामीचा इशारा
