नवी दिल्ली  – भारतातील आघाडीची हवामान अंदाज संस्था स्कायमेटने मान्सून 2025 साठीचा अंदाज जाहीर केला आहे. यंदाचा मान्सून सामान्य राहील आणि जून ते सप्टेंबर या काळात सरासरीच्या 103 टक्के पाऊस पडेल, असा अंदाज वर्तवण्यात आला आहे. यात 5 टक्के चढ-उतार शक्य आहे. दीर्घकालीन सरासरीनुसार या चार महिन्यांत 868.6 मिलिमीटर पाऊस अपेक्षित आहे.

स्कायमेटचे जतिन सिंह म्हणाले, “यंदा ला निना कमकुवत आणि कमी काळ राहील, तर पाऊस खराब करणारा एल निनो प्रभावही दिसणार नाही. एल निनो दक्षिणी दोलन (ENSO) न्यूट्रल राहील, ज्यामुळे मान्सूनला फायदा होईल. हिंदी महासागरातील स्थिती आणि सकारात्मक इंडियन ओशन डायपोल (IOD) यामुळे पाऊस चांगला राहण्याची शक्यता आहे.” मान्सूनच्या पहिल्या टप्प्यापेक्षा दुसऱ्या टप्प्यात (जुलै ते सप्टेंबर) पावसाचा जोर वाढेल, असाही अंदाज आहे.

क्षेत्रनिहाय पावसाचा अंदाज
स्कायमेटनुसार, पश्चिम आणि दक्षिण भारतात चांगला पाऊस पडेल. केरळ, कर्नाटकचा किनारपट्टी भाग, गोवा आणि पश्चिम घाटात जास्त पाऊस अपेक्षित आहे. मध्य प्रदेश आणि महाराष्ट्रात पुरेसा पाऊस होईल, तर उत्तरेकडील राज्ये आणि पर्वतीय भागात सरासरीपेक्षा कमी पाऊस पडण्याची शक्यता आहे.

महिनानिहाय अंदाज

जून: सरासरीच्या 96 टक्के (165.3 मिमी) पाऊस, म्हणजे सामान्य स्थिती.

जुलै: 102 टक्के (280.5 मिमी) पाऊस, सरासरीपेक्षा किंचित जास्त.

ऑगस्ट: 108 टक्के (254.9 मिमी), सरासरीपेक्षा अधिक पाऊस.

सप्टेंबर: 104 टक्के (167.9 मिमी), सामान्य ते जास्त पाऊस.

पाऊस कसा मोजला जातो?

भारतीय हवामान विभागाने पावसाच्या पाच श्रेणी ठरवल्या आहेत:
अपूरा पाऊस: सरासरीच्या 90 टक्क्यांपेक्षा कमी.

कमी पाऊस: 90 ते 95 टक्के.

सामान्य पाऊस: 96 ते 104 टक्के.

जास्त पाऊस: 105 ते 110 टक्के.

सर्वाधिक पाऊस: 110 टक्क्यांहून अधिक.

स्कायमेटचा अंदाज ‘सामान्य’ ते ‘जास्त’ पावसाच्या श्रेणीत बसतो.

मान्सूनवर परिणाम करणारे घटक –
एल निनो आणि ला निना यांचा प्रभाव कमी असला तरी इंडियन ओशन डायपोल (IOD) सध्या प्रभावहीन आहे. तरीही त्याची सकारात्मक स्थिती मान्सूनच्या सुरुवातीला फायदेशीर ठरेल. चार महिन्यांपैकी अर्धा काळ उलटल्यानंतर मान्सूनला अधिक गती मिळेल. स्कायमेटच्या अंदाजाने शेतकरी आणि सर्वसामान्यांना दिलासा मिळाला असून, यंदा पाऊस चांगला राहण्याची आशा वाढली आहे.