Election News – भारत निवडणूक आयोगाने मतदान केंद्रस्तरीय अधिकारी (बीएलओ) यांचे वार्षिक मानधन दुप्पट करण्याचा तसेच बीएलओ पर्यवेक्षकांचे मानधन वाढवण्याचा निर्णय घेतला आहे. याशिवाय, मतदार नोंदणी अधिकारी (ईआरओ) आणि सहाय्यक मतदार नोंदणी अधिकारी ( एईआरओ ) यांना प्रथमच मानधन देण्यात येणार आहे. निवडणूक आयोगाच्या निर्णयानुसार बीएलओचे २०१५ पासूनचे मानधन सहा हजार वरून १२ हजार तर मतदार यादी पुनरावलोकनासाठी बीएलओ प्रोत्साहन रक्कम १ हजार वरून २ हजार रुपये करण्यात आली आहे. त्याचप्रमाणे, बीएलओ पर्यवेक्षक यांचे मानधन १२ हजार वरून १८ हजार रुपये करण्यात आले आहे. एईआरओ यांना प्रथमच २५ हजार रुपये तर ईआरओ यांनाही प्रथमच ३० हजार रुपये मानधन देण्यात येईल. याशिवाय, बिहारपासून सुरू झालेल्या या विशेष तीव्र पुनरावलोकन (एसआयआर) मोहिमेसाठी बीएलओंना सहा हजार रुपये इतके विशेष प्रोत्साहन मानधन देण्यात येणार आहे. हा निर्णय निवडणूक प्रक्रियेची अचूकता, पारदर्शकता आणि विश्वासार्हता वाढवण्यासाठी अथक परिश्रम करणा-या कर्मचा-यांना योग्य मानधन देण्याच्या वचनबद्धतेचे प्रतीक असल्याचे भारत निवडणूक आयोगाने प्रसिद्धीपत्रकाद्वारे कळविले आहे.
