नवी दिल्ली: आंतरराष्ट्रीय बाजारात आलेली नरमी आणि मोठ्या प्रमाणावर झालेल्या नफावसुलीमुळे सोने आणि चांदीच्या किमतीत मोठी घसरण नोंदवली गेली आहे. अवघ्या पाच दिवसांत मौल्यवान धातूंचे दर कोसळल्याने गुंतवणूकदारांमध्ये चिंतेचे वातावरण आहे. इंडियन बुलियन ज्वेलर्स एसोसिएशन (IBJA) च्या आकडेवारीनुसार, १७ अक्टोबरपासून सोने प्रति १० ग्रॅममागे तब्बल ६,९६७ रुपयांनी खाली आले आहे. बुधवार, २२ अक्टोबर रोजी सोन्याचा भाव घसरून १,२३,९०७ रुपये प्रति १० ग्रॅमवर पोहोचला. याच काळात चांदीच्या दरात मोठी घसरण झाली असून ती १८,७७४ रुपयांनी कमी होऊन १,५२,५०१ रुपये प्रति किलो झाली आहे.चांदीच्या दरात सोन्याच्या तुलनेत अधिक मोठी घसरण झाली आहे. आंतरराष्ट्रीय बाजारातही सोन्याच्या किमतीत मंगळवारी पाच वर्षांतील सर्वात मोठी एका दिवसातील विक्री झाली, ज्यामुळे किंमत ६ टक्क्यांहून अधिक खाली आली. स्पॉट गोल्ड ४,१०९.१९ डॉलर प्रति औंसवर व्यवहार करत होते. या तीव्र घसरणीमुळे गुंतवणूकदारांना सावधगिरी बाळगण्याचा आणि टप्प्याटप्प्याने गुंतवणूक करण्याचा सल्ला देण्यात आला आहे. ही घसरण खरेदीची योग्य संधी आहे की फक्त क्षणिक मंदी, यावर बाजारात आता चर्चा सुरू झाली आहे.
