सोन्याने रचला नवा विक्रम Gold Rate । 
जागतिक अनिश्चिततेमुळे सोन्याच्या किमतीत प्रचंड वाढ झाली आहे. गुरुवारी MCX वर ५ जूनच्या एक्सपायरी असलेल्या सोन्याचा भाव ९२,४०० रुपये प्रति १० ग्रॅमवर पोहोचला. नंतर किंचित घसरण होऊन तो ९२,०५० रुपयांवर स्थिरावला. सोन्याने ९२,००० चा टप्पा पार करण्याची ही पहिलीच वेळ आहे, ज्यामुळे हा आतापर्यंतचा सर्वोच्च स्तर ठरला आहे.आठवड्यात ५,४७२ रुपयांची वाढ

या आठवड्याच्या सुरुवातीला सोन्याच्या किमतीत किंचित घट दिसली होती, पण सोमवारपासून गुरुवार, १० एप्रिलपर्यंत १० ग्रॅमच्या किमतीत ५,४७२ रुपयांची वाढ झाली. सोमवारी MCX वर सोन्याचा दर ८६,९२८ रुपये होता, जो गुरुवारी ९२,४०० रुपयांवर पोहोचला.

देशांतर्गत बाजारात सोन्याचा भाव किती?
MCX वर सोन्याने विक्रम रचला असला तरी, देशांतर्गत बाजारातही किमती ९०,००० रुपयांवर कायम आहेत. इंडियन बुलियन ज्वेलर्स असोसिएशन (IBJA) नुसार, २४ कॅरेट सोन्याचा दर ९०,१६० रुपये, २२ कॅरेटचा ८८,००० रुपये, २० कॅरेटचा ८०,२४० रुपये आणि १८ कॅरेटचा ७३,०३० रुपये प्रति १० ग्रॅम आहे.

सोन्याच्या किमतीत झालेल्या या तीव्र वाढीमागे अमेरिकेचे अध्यक्ष डोनाल्ड ट्रम्प यांनी सुरू केलेले टॅरिफ वॉर, त्यामुळे निर्माण झालेली अनिश्चितता आणि आर्थिक मंदीची भीती हे प्रमुख घटक आहेत. याशिवाय, अमेरिका-चीनमधील वाढता तणावही सोन्याच्या किमतींना हवा देत आहे. सोने हे नेहमीच सुरक्षित गुंतवणुकीचे साधन मानले जाते. अनिश्चिततेच्या काळात त्याची मागणी आणि किंमत दोन्ही वाढतात, आणि सध्याच्या व्यापार युद्धामुळे सोन्याने नव्या उंचीला स्पर्श केला आहे.