Gokulashtami Dahi Handi 2025 । राजधानी मुंबईसह उपनगरातील दहीहंडी उत्सवाकडे अवघ्या महाराष्ट्राचे लक्ष लागलेले असते. महाराष्ट्राच्या कानाकोपऱ्यातून मुंबईतील उंचच उंच मनोऱ्यांचे थर पाहायला, सेलिब्रिटींचा डान्स पाहायला गर्दी करतात. तर, सोशल मीडियातूनही मुंबईच्या दहीहंडीचा बोलबोला दिसून येतो. आज (दि. 16) संपूर्ण राज्यात दहीहंडी उत्सव मोठ्या उत्साहात साजरा केला जात आहे. अशातच आता दही हंडीची रस्सी बांधताना खाली पडून एकाचा मृत्यू झाला आहे. दही हंडीची रस्सी बांधताना मुंबईतील बाल गोविंदा पथकचा एक सदस्य खाली पडला होता, त्याला तातडीने गोवंडी येथील शताब्दी रुग्णालयात उपचारासाठी नेण्यात आले. मात्र भर्ती करण्याच्या पूर्वीच डॉक्टरांनी त्याला मृत घोषित केले. जगमोहन शिवकिरन चौधरी (32) असं या गोविंदाच नाव आहे. दहीहंडी उत्सवातील जखमी गोविंदांची माहिती विविध सरकारी आणि बीएमसी रुग्णालयांनी दिली आहे. यानुसार दुपारी 3 वाजेपर्यंत 30 गोविंदा जखमी झाले असल्याचे समोर आले आहे. मुंबई शहर – जखमी 18; उपचार सुरू 12 , डिस्चार्ज – 6 / मुंबई पूर्व उपनगर – जखमी 6; उपचार सुरू 3, डिस्चार्ज 3 / मुंबई पश्चिम उपनगर – जखमी 6; उपचार सुरू 1, डिस्चार्ज 5 / एकूण – 30 जखमी; उपचार सुरू- 15; डिस्चार्ज 15 यंदाच्या वर्षी ठाण्यात जोगेश्वरीच्या कोकण नगर गोविंदा पथकाने तब्बल 10 थर रचून विश्वविक्रम केला. जोगेश्वरी येथील कोकण नगर गोविंदा पथकाने ही विश्वविक्रमी कामगिरी करून दाखवली. यानंतर सर्वांनी एकच जल्लोष केला. शिवसेना शिंदे गटाचे नेते आणि परिवहन मंत्री प्रताप सरनाईक यांच्या संस्कृती दहीहंडी कार्यक्रमात 10 थर रचण्याचा हा विश्वविक्रम करण्यात आला. यावेळी प्रताप सरनाईक यांनी आनंद व्यक्त करत या पथकाला 25 लाखांचे बक्षीस जाहीर केले आहे. दरम्यान, मागील काही वर्षात ‘जय जवान’ गोविंदा पथक हे सातत्याने 9 थर रचत आलं आहे. यंदा मात्र, अत्यंत आश्चर्यरित्या जोगेश्वरीच्या कोकण नगर गोविंदा मंडळाने कडक 10 थर रचून विश्वविक्रमाला गवसणी घातली आहे.
