Release date of Golmaal 5 announced :  अभिनेता अजय देवगणच्या आगामी सिनेमांची चाहत्यांमध्ये मोठी उत्सुकता आहे. ‘दृश्यम ३’ची प्रतीक्षा सुरू असतानाच आता अजय देवगणच्या बहुप्रतिक्षित ‘गोलमाल ५’ची जोरदार चर्चा रंगली आहे. दिग्दर्शक रोहित शेट्टीने सिनेमाचं नवं पोस्टर सोशल मीडियावर शेअर करत प्रदर्शनाची तारीख जाहीर केली आहे. त्यामुळे ‘गोलमाल’च्या चाहत्यांसाठी ही मोठी अपडेट मानली जात आहे.

रोहित शेट्टीने त्याच्या अधिकृत इन्स्टाग्राम अकाउंटवर ‘गोलमाल ५’चं पोस्टर शेअर केलं आहे. या पोस्टरमध्ये गोपाल आणि त्याचा ग्रुप बाईक्सवरून जाताना दिसत आहे. पोस्टरमधील कलाकारांचा अंदाज आणि सिनेमाच्या टायटलमधून पुन्हा एकदा धमाल, गोंधळ आणि हास्याची मेजवानी पाहायला मिळणार असल्याचे संकेत मिळत आहेत.

“हास्य, मजा, आनंद, सुख आणि कुटुंब… यापेक्षा अधिक काही नाही. गोलमाल ८ जानेवारी २०२७ रोजी चित्रपटगृहांमध्ये प्रदर्शित होत आहे,” असं कॅप्शन त्याने या पोस्टसोबत लिहिलं आहे. त्यामुळे नव्या वर्षाची सुरुवात ‘गोलमाल ५’च्या धमाल कॉमेडीसोबत होणार आहे.

 

View this post on Instagram

 

A post shared by Rohit Shetty (@itsrohitshetty)

जुन्या कलाकारांसोबत नवीन चेहरेही

‘गोलमाल ५’मध्ये फ्रँचायझीतील काही जुने कलाकार पुन्हा एकदा प्रेक्षकांच्या भेटीला येणार आहेत. ‘गोलमाल’च्या पहिल्या भागात लक्ष्मणची भूमिका साकारणारा अभिनेता श्रेयस तळपदे पुन्हा एकदा या फ्रँचायझीचा भाग झाला आहे. त्यामुळे जुन्या व्यक्तिरेखांची केमिस्ट्री आणि नव्या कथानकातील धमाल पाहण्यासाठी चाहते उत्सुक आहेत.

दरम्यान, अभिनेता अक्षय कुमारही ‘गोलमाल ५’मध्ये कॅमेओ करताना दिसणार असल्याची चर्चा आहे. मात्र, त्याची भूमिका नेमकी काय असेल, याबाबत अधिकृत माहिती अद्याप समोर आलेली नाही. त्यामुळे अक्षय कुमारचा कॅमेओ सिनेमात नेमका कोणता ट्विस्ट घेऊन येणार, याबाबत चाहत्यांमध्ये उत्सुकता आहे.

चार भागांनी गाजवला बॉक्स ऑफिस

रोहित शेट्टीने आतापर्यंत ‘गोलमाल’ फ्रँचायझीचे चार सिनेमे प्रेक्षकांच्या भेटीला आणले आहेत. २००६ मध्ये प्रदर्शित झालेल्या ‘गोलमाल: फन अनलिमिटेड’पासून या फ्रँचायझीला सुरुवात झाली. त्यानंतर ‘गोलमाल रिटर्न्स’, ‘गोलमाल ३’ आणि ‘गोलमाल अगेन’ असे तीन भाग प्रेक्षकांच्या भेटीला आले.

या प्रत्येक भागामध्ये विनोद, गोंधळ, गैरसमज आणि कलाकारांच्या भन्नाट कॅामेडी टायमिंगमुळे प्रेक्षकांचं मनोरंजन झालं. अजय देवगणचा गोपाल, अरशद वारसीचा माधव, श्रेयस तळपदेचा लक्ष्मण आणि तुषार कपूरचा लकी या व्यक्तिरेखांनीही प्रेक्षकांच्या मनात वेगळं स्थान निर्माण केलं आहे.

कॉमेडीसोबत पुन्हा काहीतरी वेगळं?

‘गोलमाल अगेन’मध्ये रोहित शेट्टीने नेहमीच्या कॉमेडीसोबत हॉररचा तडका दिला होता. त्यामुळे ‘गोलमाल ५’मध्ये रोहित शेट्टी नेमका कोणता नवा प्रयोग करणार, याकडे चाहत्यांचं लक्ष लागलं आहे. सिनेमाची कथा, नव्या व्यक्तिरेखा आणि जुन्या कलाकारांची केमिस्ट्री यामुळे हा पाचवा भाग आणखी मनोरंजक होण्याची शक्यता आहे.

Mamata Banerjee: ममता बॅनर्जींवर नवं संकट! नंदीग्रामपाठोपाठ आणखी एका उमेदवाराची माघार