नवी दिल्ली: आंतरराष्ट्रीय प्रवासासाठी जर्मनीमार्गे युरोप आणि अमेरिकेला जाणाऱ्या भारतीय नागरिकांसाठी केंद्र सरकारने एक सुखद बातमी दिली आहे. जर्मनीने भारतीय पासपोर्ट धारकांसाठी असलेली एअरपोर्ट ट्रान्झिट व्हिसाची अट अधिकृतपणे रद्द करण्याचा निर्णय घेतला आहे. जर्मनीचे चान्सलर फ्रेडरिक मर्ज सध्या भारत दौऱ्यावर असून १२ जानेवारी २०२६ रोजी नवी दिल्ली येथे झालेल्या बैठकीत त्यांनी ही महत्त्वपूर्ण घोषणा केली. चान्सलर फ्रेडरिक मर्ज यांचा हा पहिलाच भारत आणि आशिया दौरा असून, या निर्णयामुळे दोन्ही देशांतील संबंधांना नवी दिशा मिळण्याची शक्यता वर्तवली जात आहे. या नवीन धोरणामुळे भारतीय प्रवाशांना आता फ्रँकफर्ट, म्युनिक किंवा बर्लिन यांसारख्या जर्मनीतील मोठ्या आंतरराष्ट्रीय विमानतळांवरून कनेक्टिंग फ्लाईट पकडण्यासाठी शेंगेन टाईप-A व्हिसा घेण्याची गरज भासणार नाही. यापूर्वी भारतीय नागरिकांना विमानतळाच्या ट्रान्झिट एरियातून बाहेर न पडता केवळ विमान बदलण्यासाठीही व्हिसा घ्यावा लागत असे. या प्रक्रियेत प्रवाशांना मोठा आर्थिक भुर्दंड सहन करावा लागत होता आणि कागदपत्रांच्या प्रक्रियेत वेळही वाया जात होता. आता या जाचक अटीतून सुटका मिळाल्याने ब्रिटन, अमेरिका, कॅनडा आणि युरोपातील इतर देशांत जाणाऱ्या भारतीयांचा प्रवास अधिक वेगवान आणि सुखकर होणार आहे. तथापि, ही सवलत घेताना प्रवाशांना काही महत्त्वाच्या नियमांचे पालन करावे लागणार आहे. व्हिसा-फ्री ट्रान्झिटची ही सुविधा केवळ विमानतळाच्या आंतरराष्ट्रीय ट्रान्झिट क्षेत्रापुरतीच मर्यादित असेल. याचा अर्थ असा की प्रवाशांना विमानतळाबाहेर जाण्याची, शहरात फिरण्याची किंवा हॉटेलमध्ये राहण्याची परवानगी नसेल. प्रवाशांनी त्यांची पुढील फ्लाईट २४ तासांच्या आत पकडणे अनिवार्य असून, त्यांच्याकडे अंतिम प्रवासाच्या देशाचा वैध व्हिसा आणि सर्व आवश्यक कागदपत्रे असणे आवश्यक आहे. जर प्रवाशांना जर्मनीमध्ये प्रवेश करायचा असेल किंवा तिथे मुक्काम करायचा असेल, तर त्यांना पूर्वीप्रमाणेच वैध शेंगेन किंवा जर्मन व्हिसा घ्यावा लागेल. या निर्णयाचा सर्वाधिक फायदा वारंवार परदेशवारी करणाऱ्या पर्यटकांना आणि व्यावसायिकांना होणार आहे. जर्मनीने घेतलेल्या या निर्णयाचे पर्यटन क्षेत्रातून स्वागत होत असून, यामुळे विमान प्रवासाचे नियोजन करणे आता अधिक सोपे झाले आहे. सध्या या निर्णयाच्या अधिकृत अधिसूचनेची प्रतीक्षा असून, लवकरच ही सुविधा प्रत्यक्षात लागू केली जाणार आहे.
