प्रभात वृत्तसेवा पिंपरी – राज्यातील शाळांच्या कामकाजात एकसूत्रता आणण्यासाठी मोबाइल ॲपच्या माध्यमातून जिओ टॅगिंग करण्याचा निर्णय शालेय शिक्षण विभागाने घेतला आहे. यामुळे राज्यातील शाळांची माहिती एका क्लिकवर मिळत असून, जिओ टॅगिंगच्या माध्यमातून शाळांवर वॉच ठेवला जात आहे. पिंपरी-चिंचवड शहरातील सर्व माध्यमांच्या शाळांचे जिओ टॅगिंगचे काम पूर्ण झाले आहे. त्यामुळे आता शाळांची माहिती एका क्लिकवर मिळणार आहे. राज्यातील ग्रामीण, शहरी भागातील प्राथमिक शिक्षणाचे संस्कार केंद्र असणाऱ्या अंगणवाडी, विविध माध्यमांच्या शाळांच्या कामकाजात एकसूत्रीपणा आणण्यासाठी मोबाईल ॲपच्या माध्यमातून जिओ टॅगिंग करण्याचा निर्णय राज्य सरकारने घेतला आहे. त्यानुसार, राज्यातील सर्व शाळा, अंगणवाडी केंद्रांना छायाचित्रांसह संबंधित माहिती नोंदवणे बंधनकारक केले होते; तसेच संबंधित शाळांनी भरलेल्या माहितीची खातरजमा करण्याची जबाबदारी शिक्षण अधिकाऱ्यांना देण्यात आली आहे. शासनाने महाराष्ट्र रिमोट सेन्सिंग ॲप्लिकेशन सेंटर या संस्थेने शालेय शिक्षण विभागातील सर्व प्रकारच्या शाळांचे भौतिक ठिकाण छायाचित्रासह टॅग करून भौगोलिक तंत्रज्ञानाद्वारे सर्व माहिती एकत्रित करण्यासाठी महा स्कूल जीआयएसफ हे मोबाईल ॲप विकसित केले आहे. या ॲपमध्ये शाळांना त्यांचा यू-डायस कोड किंवा यु-डायस प्लसमधील संबंधित शाळांच्या मुख्याध्यापक यांनी नोंदविलेला मोबाईल क्रमांक टाकून लॉगिन करायचे आहे. त्यानंतर शाळेची यू-डायस प्लसमध्ये भरलेली माहिती या ॲपमध्ये दिसणार आहे. त्यानंतर शाळेचे ‘जीआयएस’मध्ये लोकेशनवरून शाळेचे नाव, शाळेची संपूर्ण इमारत, किचन शेड, मुलांचे व मुलींचे स्वच्छतागृह सुविधा, पिण्याच्या पाण्याची सुविधा असे एकूण पाच फोटो समाविष्ट करुन संबधित शाळेने माहिती भरली आहे. ही माहिती एका क्लिकवर दिसणार आहे. सुविधांची माहिती मिळणार राज्यातील सर्व शाळांबाबतची संपूर्ण माहिती केंद्र शासनाच्या यू- डायस प्लस या पोर्टलवर उपलब्ध केली आहे. विद्यार्थी संख्या, शिक्षक संख्या, शाळांमध्ये उपलब्ध भौतिक सुविधा, संगणकीय सुविधा आदी शाळांबाबतच्या विविध माहितीचा यात समावेश आहे. शासनस्तरावर विविध धोरण, कार्यक्रमांची आखणी तसेच अंमलबजावणीचा आराखडा तयार करताना या माहितीचा वापर केला जाणार आहे. महाराष्ट्र रिमोट सेन्सिंग ॲप्लिकेशन सेंटर या संस्थेसोबत करार करून माहिती गोळा करण्याचे काम देण्यात आले आहे. स्वतंत्र डॅशबोर्ड विविध विभागांची माहिती, यू-डायस प्लस या पोर्टलवरील शालेय शिक्षण विभागांच्या माहितीचे एकत्रीकरण केले जाईल. स्वतंत्र डॅशबोर्ड यासाठी तयार केले जाईल. तसेच महाराष्ट्र रिमोट सेन्सिंग ॲप्लिकेशन सेंटर या संस्थेतर्फे शालेय शिक्षण विभागातील सर्व प्रकारच्या शाळांचे भौतिक ठिकाण छायाचित्रासह टॅग करण्यात येईल. गोळा केलेली माहिती मोबाईल ॲप महास्कूल जीआयएसवरून उपलब्ध होणार आहे. “पिंपरी-चिंचवड शहरातील शाळाचे जिओ टॅगिगचे काम अपूर्ण होते. पण, त्या शाळांना पाठपुरावा करुन आता सर्व शाळांचे काम पूर्ण झाले आहे. शाळांनी मान्यता घेताना दिलेली माहिती आणि ॲपमध्ये भरलेली माहिती यांची पडताळणी होवून त्यामध्ये तफावत आहे का? देखील तपासले जाणार आहे.” – संगीता बांगर, शिक्षण अधिकारी, महानगरपालिका.
