नवी दिल्ली : जनरल उपेंद्र द्विवेदी यांनी रविवारी लष्कराचे 30 वे प्रमुख म्हणून पदभार स्वीकारला आहे. जनरल उपेंद्र द्विवेदी यांच्या आधी जनरल मनोज पांडे यांनी ही जबाबदारी घेतली होती. द्विवेदी हे या पदावर राहणार असल्याची घोषणा 11 जून रोजी करण्यात आली होती. जनरल उपेंद्र द्विवेदी यांनी फेब्रुवारी 2024 ते जून 2024 पर्यंत लष्कराचे उपप्रमुख म्हणून काम केले आहे. याआधी त्यांनी IGAR (GOC) आणि सेक्टर कमांडर आसाम रायफल्स म्हणूनही काम केले आहे. द्विवेदी यांनी 2022 ते 2024 या काळात रायझिंग स्टार कॉर्प्स आणि नॉर्दर्न आर्मीचे नेतृत्व केले आहे.1 जुलै 1964 रोजी जन्मलेले द्विवेदी हे मध्य प्रदेशचे रहिवासी आहेत. त्यांनी सैनिक स्कूल रीवा (एमपी) येथे शिक्षण घेतले आणि जानेवारी 1981 मध्ये राष्ट्रीय संरक्षण प्रबोधिनीचा भाग बनले. ते संरक्षण आणि व्यवस्थापन अभ्यासात एमफिल आहेत आणि त्यांनी स्ट्रॅटेजिक स्टडीज आणि मिलिटरी सायन्समध्ये दोन पदव्युत्तर पदवी प्राप्त केली आहे. 15 डिसेंबर 1984 रोजी द्विवेदी यांची जम्मू आणि काश्मीर रायफल्सच्या 18 व्या बटालियनमध्ये नियुक्ती झाली. आपल्या लष्करी कारकिर्दीत त्यांनी काश्मीर खोऱ्यात तसेच राजस्थानच्या वाळवंटात बटालियनचे नेतृत्व केले आहे.
