Gangotri Waterfall – जावळी तालुक्यातील उंबरीवाडी धबधबा व गंगोत्रीचा धबधबा पर्यटकांसाठी आकर्षण बनला असून यावर्षी जून महिन्यात पावसाळ्यात या परिसरात येणार्या पर्यटकांना पार्किंगसह इतर सुविधा पुरवण्यासाठी वन विभाग व संयुक्त वन समिती आणि ग्रामस्थ मंडळ जाधव उंबरीवाडी यांच्याकडून नियोजन करण्यात आले असल्याची माहिती आनंद जाधव यांनी दिली आहे. जागतिक कास पठाराला भेट देण्यासाठी जाणार्या पर्यटकांची पावले उंबरीवाडी येथील हे दोन्ही धबधबे पाहण्यासाठी वळू लागली आहे. मात्र, या ठिकाणी पर्यटकांसाठी काहीच सुविधा उपलब्ध नव्हत्या. उंबरीवाडीला येणार्या पर्यटकांना धबधबा पाहण्याचा आनंद लुटण्यासाठी सुविधा निर्माण करण्यासाठी या गावचे ग्रामस्थ व मुंबईतील कलिना शाखेचे उपशाखाप्रमुख आनंद जाधव यांनी उपमुख्यमंत्री एकनाथ शिंदे यांच्यासह सातारा वन विभागाकडे पाठपुरावा सुरु केला आहे. यामुळे यावर्षीच्या मान्सूनमध्ये येणार्या पर्यटकांना त्यांच्या वाहनांच्या पार्किंगसह इतर सुविधा निर्माण करण्याबाबत हालचाली सुरु झाल्या असून त्यामुळे पर्यटकांचा ओघ वाढणार असून उंबरीवाडीच्या धबधबा हे पर्यटकांसाठी खास आकर्षण बनणार आहे. उंबरीवाडी धबधबा हा प्रसिद्ध कास पठाराच्या कुशीत वसलेला एक अतिशय नयनरम्य आणि निसर्गरम्य धबधबा आहे. सातार्यापासून 33 कि. मी. तर कास पठारापासून अवघ्या 8 किलोमीटरवर असलेला हा सह्याद्रीच्या डोंगररांगांमध्ये आणि हिरवेगार वातावरणात असलेला हा धबधबा पावसाळ्यात पर्यटकांना आकर्षित करतो. येथे शांत आणि निसर्गरम्य वातावरणाचा आनंद घेता येतो. हा धबधबा पूर्व शिवकालीन असून या धबधब्याचे वैशिष्ट्य म्हणजे या धबधब्याजवळ जवळ जाता येते व जवळून पाहता सुद्धा येतो. हा धबधबा सुमारे 900 मीटर उंचीचा आहे. हा धबधबा दोन टप्प्यांमध्ये आहे. गंगोत्रीचा कडा हा धबधबा 1000 मीटर उंचीचा असून हा धबधबा भागातील सर्वात उंच शिवकालीन धबधबा आहे. या धबधब्याचे वैशिष्ट्य म्हणजे या धबधब्याच्या एकदम जवळ जाता येते हा धबधबा पावसाळ्याच्या काळामध्ये सुरू होतो.
