दोन महिन्यांपासून सुरू आहे मंदिरांच्या प्रतिकृतींना आकार देण्याचे काम
Ganeshotsav: गणेशोत्सवाला अवघे काही दिवस शिल्लक राहिल्याने शहरातील गणपती मंडळांमध्ये तयारीला वेग आला आहे. आकर्षक देखावे, भव्य मंदिरांच्या प्रतिकृती आणि विद्यूत रोषणाईतून भाविकांचे लक्ष वेधून घेण्यासाठी लगबग सुरू आहे. मोठ्या मंडळांच्या देखाव्यांसाठी कुशल कारागिरांनी दोन महिन्यांपासूनच कामाला सुरुवात केली असून, सध्या देखाव्यांना अंतिम स्वरूप देण्याचे काम सुरू आहे.

गणपती मंडळांकडून दरवर्षी ऐतिहासिक वास्तू, प्राचीन मंदिरे, धार्मिक स्थळे तसेच सामाजिक संदेश देणारे देखावे उभारले जातात. यंदाही काही मंडळांनी मंदिरांच्या भव्य प्रतिकृतीवर भर दिला आहे. त्यासाठी फायबर, लोखंड, लाकूड, प्लायवूड तसेच विविध सजावटीच्या साहित्याचा वापर होत आहे. कारागिरांकडून प्रतिकृती उभारण्याचे काम सुरू आहे. देखाव्यांमागे कारागिरांची अनेक दिवसांची मेहनत असते. या कामासाठी परराज्यांतून आलेल्या कारागिरांनाही रोजगाराची मोठी संधी असते.

काही मोठ्या मंडळांच्या देखाव्यांसाठी तब्बल १५० कामगार दिवसरात्र मेहनत घेत आहेत. स्ट्रक्चर उभारण्यापासून फायबरचे भाग तयार करणे, त्यावर रंगकाम करणे, नक्षीकाम, सजावट आणि विद्युत व्यवस्था यासाठी वेगवेगळे कारागीर काम करत आहेत. उत्तर प्रदेश, बिहारमधून मोठ्या संख्येने कारागीर पुण्यात दाखल झाले आहेत.

फायबरची आकर्षक मंदिरे
यंदा देखाव्यांमध्ये फायबरच्या मंदिरांच्या प्रतिकृती विशेष आकर्षण ठरण्याची शक्यता आहे. प्रत्यक्ष मंदिरासारखे दिसणारे खांब, कमानी, घुमट, नक्षीकाम आणि विविध कलाकुसरीचे भाग कारागीर तयार करत आहेत. फायबरचे भाग तयार करून रंगरंगोटी, सजावटीचा अंतिम हात दिला जात आहे. त्यानंतर हे भाग मंडपाच्या ठिकाणी नेऊन जोडण्यात येणार आहेत.