मुंबई – ‘गांधी गोडसे एक युद्ध’ या चित्रपटाची सध्या सर्वत्र चर्चा आहे. दोन वेगळ्या विचारसरणीचे पैलू या चित्रपटातून उलगडले जाणार आहेत. या चित्रपटाचा जबरदस्त ट्रेलर प्रदर्शित झाल्यानंतर आता सर्वांना चित्रपटाच्या प्रदर्शनाची उत्सुकता लागली आहे. मराठमोळा अभिनेता चिन्मय मांडलेकरने यामध्ये नथुराम गोडसेची भूमिका साकारली आहे तर गुजराती सिनेसृष्टीतील दीपक अँटनी यांनी महात्मा गांधींची भूमिका साकारली आहे. गांधी की गोडसे, तुम्ही कोणाला फॉलो करता ? असा सवाल चित्रपटाच्या प्रमोशनदरम्यान अभिनेता चिन्मय मांडलेकर यांना विचारण्यात आला होता त्यावर त्यांनी भन्नाट उत्तर दिले.

एका हिंदी मीडियाला मुलाखत देताना चिन्मय मांडलेकर यांनी चित्रपट आणि इतिहासातील विविध गोष्टींवर भाष्य केले. गांधींजींबाबत आपण सगळे बऱ्यापैकी जाणतो परंतु गोडसेंबाबत सर्वकाही माहिती नसल्याचे चिन्मय मांडलेकर यांनी यावेळी सांगितले. तसेच या रोलचा अभ्यास करण्यासाठी गोडसे यांनी न्यायालयात दिलेल्या शेवटच्या जबाबाची मदत झाल्याचे देखील चिन्मयने सांगितले.

गांधी की गोडसे कोणाला फॉलो करता असा सवाल समोर येताच चिन्मय म्हणाला, “माझे आदर्श छत्रपती शिवाजी महाराज आहेत. गोडसेबाबत जास्त काही माहिती नसल्याने त्यांना फॉलो करण्यासारखे काहीच काही. राहिला प्रश्न गांधींजींचा तर त्यांचे पाच टक्के विचार जरी आपण फॉलो करू शकलो तरी खूप आहे” असं स्पष्ट मत चिन्मयने यावेळी व्यक्त केलं.

चिन्मय मांडलेकरसह राजकुमार संतोषी यांची मुलगी तनिषा संतोषी देखील या चित्रपटातून पदार्पण करताना दिसणार आहे.हा चित्रपट प्रजासत्ताक दिनाच्या मुहूर्तावर म्हणजेच २६ जानेवारीला प्रदर्शित होणार आहे.विशेष म्हणजेच शाहरुख खानचा पठाण हा सिनेमा देखील याच दिवशी प्रदर्शित होणार आहे.