Fraud News : भांडुपमध्ये डिजिटल अरेस्टची घटना घडली आहे. एका निवृत्त बेस्ट कर्मचाऱ्याला तब्बल ३९.६० लाखांचा गंडा (Fraud News) घातल्याचा धक्कादायक प्रकार समोर आला आहे. मनी लाँड्रिंगच्या गुन्ह्यात अडकवण्याची भीती दाखवत अज्ञातांनी पोलीस अधिकारी असल्याचे भासवत सायबर फसवणूक केली आहे. याप्रकरणी ईस्ट सायबर पोलिसांनी पाच जणांविरुद्ध गुन्हा दाखल केला आहे. पोलिसांच्या माहीतीनुसार, दीपक मोंडकर हे २०१९ मध्ये बेस्ट सेवेतून निवृत्त झाले आहेत. या फसवणुकीची सुरुवात २९ जानेवारी रोजी एका फोन कॉलने झाली. बिनी शर्मा नावाच्या एका महिलेने मोंडकर यांना फोन केला आणि त्यांच्या नावाने काढलेले एक सिम कार्ड बेकायदेशीर कृत्यांसाठी वापरले गेले असल्याचे सांगितले. त्यानंतर हा फोन मनोज शिंदे नावाच्या व्यक्तीकडे सोपवण्यात आला, ज्याने स्वतःची ओळख मुंबई पोलीस अधिकारी म्हणून करून दिली. त्याने मोंडकर यांना मनी लाँड्रिंगच्या प्रकरणात गोवण्याची भीती घातली. त्याने मोंडकर यांच्याकडून कुटुंबाची माहिती, बँक खात्याचा तपशील आणि घरातील सोन्या-चांदीच्या दागिन्यांची सर्व माहिती घेतली तसेच, त्यांना घर सोडून कुठेही न जाण्याची ताकीद देत घरातच डिजिटल अटक करून ठेवण्यात आले. कायदेशीर कारवाईची भीती दाखवत त्यांना विविध खात्यांवर पैसे वर्ग करण्यास भाग पाडले. अशा प्रकारे टप्प्याटप्प्याने मोंडकर यांच्याकडून ३९.६० लाख रुपये काढून घेतले. हे प्रकरण लक्षात आल्यानंतर मोंडकर यांनी पोलिसांकडे धाव घेतली. त्यानंतर पोलिसांनी गुन्हा नोंदवत आरोपींचा शोध सुरू केला आहे.
