John Brennan :  अमेरिकेच्या न्याय विभागाकडून लवकरच आरोपपत्र दाखल केले जाऊ शकते, असे संकेत मिळताच सेंट्रल इंटेलिजन्स एजन्सीचे (सीआयए) माजी संचालक जॉन ब्रेनन यांनी धडाकेबाज पाऊल उचलले आहे. आपल्यावर कोणताही औपचारिक आरोप निश्चित होण्यापूर्वीच त्यांनी ट्रम्प प्रशासनाविरोधात फेडरल न्यायालयात खटला दाखल करत हस्तक्षेप करण्याची विनंती केली आहे.

वॉशिंग्टनमधील न्यायालयात दाखल केलेल्या ४६ पानांच्या या खटल्यात, ब्रेनन यांच्या वकिलांनी न्यायाधीशांकडे मागणी केली आहे की, न्याय विभाग, एफबीआय आणि व्हाईट हाऊसच्या वरिष्ठ अधिकाऱ्यांना या चौकशीशी संबंधित सर्व ई-मेल्स, नोट्स आणि रेकॉर्ड्स सुरक्षित (जतन) ठेवण्याचे आदेश द्यावेत.

ट्रम्प प्रशासन त्यांच्या दीर्घकाळच्या राजकीय विरोधकांवर सूड उगवण्यासाठी फौजदारी प्रक्रियांचा बेकायदेशीर वापर करत आहे, असा युक्तिवाद भविष्यात करण्यासाठी या फाईल्स अत्यंत महत्त्वाच्या ठरतील, असे ब्रेनन यांच्या कायदेशीर पथकाचे म्हणणे आहे. ( John Brennan)

हा खटला ट्रम्प यांच्या कथित विरोधकांविरोधातील दोन प्रमुख तपासांशी संबंधित आहे. पहिला तपास, २०१६ च्या अध्यक्षीय निवडणुकीत रशियन हस्तक्षेपाबाबत ब्रेनन यांनी २०२३ मध्ये काँग्रेससमोर दिलेल्या साक्षीभोवती फिरतो, ज्यामध्ये त्यांच्यावर खोट्या साक्षीचा आरोप आहे. तर दुसरा तपास एका व्यापक ‘डीप स्टेट’ कटाचा भाग असल्याच्या सिद्धांतावर आधारित आहे, ज्यानुसार ओबामा काळातील अधिकाऱ्यांनी ट्रम्प यांच्या नागरी हक्कांचे उल्लंघन केल्याचा आरोप केला जात आहे.

ब्रेनन यांचे वकील केनेथ एल. वेनस्टाईन यांनी आरोप केला आहे की, ब्रेनन यांना केवळ त्यांच्या कायदेशीर कृती आणि ट्रम्प यांच्यावरील घटनात्मक टीकेमुळे लक्ष्य केले जात आहे. दरम्यान, न्याय विभागाच्या प्रवक्त्याने कोणत्याही सुरू असलेल्या चौकशीवर थेट भाष्य करण्यास नकार दिला असला, तरी ब्रेनन यांनी कोणावर ‘सूडाच्या मोहिमे’चा आरोप करणे ही एक हास्यास्पद गोष्ट असल्याचे म्हटले आहे.  (John Brennan)

 

तपासाची दिशा, राजकीय हस्तक्षेप –   (John Brennan)

या तपासादरम्यान तपासाची दिशा आणि राजकीय हस्तक्षेप यावरून न्याय विभागातही अंतर्गत वाद चव्हाट्यावर आले आहेत. अनुभवी राष्ट्रीय सुरक्षा अभियोक्ता मारिया मेडेटिस यांनी नाराजी व्यक्त करत या प्रकरणातून माघार घेतली आहे, तर त्यांच्या जागी ट्रम्प यांचे माजी वकील आणि ब्रेनन यांचे कट्टर टीकाकार जोसेफ डिजेनोव्हा यांची नियुक्ती करण्यात आली आहे.

 

जरी ‘सूडबुद्धीने केलेली कायदेशीर कारवाई’ हा बचाव न्यायालयात सिद्ध करणे कठीण असले, तरी ट्रम्प यांच्या दुसऱ्या कार्यकाळात लक्ष्य बनलेल्या एफबीआयचे माजी संचालक जेम्स कोमी आणि न्यूयॉर्कच्या ॲटर्नी जनरल लेटिशिया जेम्स यांच्यासारख्या मोठ्या व्यक्तींसाठी हीच मुख्य बचावाची रणनीती बनली आहे. या प्रकरणाची सुनावणी आता जो बायडन यांनी नियुक्त केलेल्या जिल्हा न्यायाधीश जिया एम. कॉब यांच्यासमोर होणार आहे.