Homemade Sweet: सणासुदीचे दिवस जवळ आले की बाजारात मिठाईच्या दुकानांमध्ये वेगवेगळ्या प्रकारच्या मिठाया दिसायला लागतात. बर्फी, पेढे, लाडू अशा अनेक मिठाईंची रेलचेल असते. मात्र बाजारातील मिठाई नेहमी ताजी असेलच असे नाही. त्यामुळे यंदाच्या सणाला बाजारातून मिठाई आणण्याऐवजी घरच्या घरीच एखादी सोपी आणि चविष्ट मिठाई बनवण्याचा पर्याय तुम्ही नक्कीच ट्राय करू शकता.

घरच्या घरी मिठाई बनवताना त्यामध्ये कोणते साहित्य वापरायचे, किती साखर घालायची आणि मिठाई किती गोड ठेवायची हे आपल्या आवडीनुसार ठरवता येते. त्यामुळे घरच्या मिठाईची चवही आपल्या पसंतीची होते. विशेष म्हणजे त्यासाठी खूप वेळ किंवा भरपूर साहित्याची गरज नसते.

यंदा रक्षाबंधन, जन्माष्टमी किंवा इतर सणासाठी कुटुंबीयांसाठी काहीतरी खास बनवायचे असेल, तर ही सोपी बर्फी तुम्ही करून पाहू शकता. कमी साहित्यामध्ये आणि अगदी सोप्या पद्धतीने ही मिठाई तयार होते. घरात आलेल्या पाहुण्यांनाही ही बर्फी आवडू शकते.

बर्फीसाठी लागणारे साहित्य  (Homemade Sweet)

ही झटपट बर्फी बनवण्यासाठी एक कप मिल्क पावडर, अर्धा कप दूध, तीन ते चार मोठे चमचे साखर, दोन मोठे चमचे तूप आणि अर्धा चमचा वेलची पावडर लागेल. यासोबत सजावटीसाठी चिरलेले बदाम-पिस्ते आणि आवडीनुसार थोडे केशरही वापरता येईल.

बर्फी बनवण्याची सोपी पद्धत  (Homemade Sweet)

सगळ्यात आधी एका कढईमध्ये दोन मोठे चमचे तूप घेऊन ते गरम करा. त्यानंतर त्यामध्ये अर्धा कप दूध आणि एक कप मिल्क पावडर घाला. हे मिश्रण मंद आचेवर सतत ढवळत राहा. मिश्रण कढईला लागू नये याची काळजी घ्या.

काही वेळाने मिश्रण घट्ट होऊ लागेल. त्यानंतर त्यामध्ये तीन ते चार चमचे साखर घाला आणि ती व्यवस्थित मिसळून घ्या. साखर पूर्णपणे मिसळल्यानंतर त्यात अर्धा चमचा वेलची पावडर घाला. आता हे मिश्रण मंद आचेवरच शिजवत राहा. मिश्रण घट्ट होऊन कढई सोडू लागले की गॅस बंद करा. त्यानंतर मिश्रण थोडे थंड होऊ द्या. हाताला थोडे तूप लावून या मिश्रणाचे आपल्या आवडीप्रमाणे छोटे गोळे किंवा बर्फीसारखे आकार तयार करा.

तयार केलेल्या मिठाईवर चिरलेले बदाम-पिस्ते घाला. आवडत असल्यास वरून थोडे केशरही सजावटीसाठी वापरू शकता. त्यानंतर ही बर्फी काही वेळ सेट होऊ द्या. बर्फी व्यवस्थित सेट झाल्यावर ती सर्व्ह करता येईल.

एक छोटी पण महत्त्वाची टिप  (Homemade Sweet)

ही बर्फी बनवताना मिश्रण जास्त वेळ किंवा मोठ्या आचेवर शिजवू नका. असे केल्यास बर्फी कडक होण्याची शक्यता असते. बर्फी मऊ आणि चविष्ट हवी असेल तर मिश्रण नेहमी मंद आचेवर शिजवणे महत्त्वाचे आहे.

सणासुदीला बाजारातून मिठाई आणण्याऐवजी यावेळी घरच्या घरी ही झटपट बर्फी बनवून पाहा. कमी साहित्य, सोपी कृती आणि आपल्या आवडीप्रमाणे गोडवा यामुळे ही रेसिपी सणासाठी एक सोपा पर्याय ठरू शकते.