न्यूयॉर्क – संयुक्त राष्ट्राच्या महासभेच्या ७९ व्या सत्राच्या निमित्ताने न्यूयॉर्कमध्ये असलेले परराष्ट्र मंत्री एस. जयशंकर यांनी आज संयुक्त राष्ट्राच्या विविध पदाधिकाऱ्यांसह काही देशांच्या परराष्ट्र मंत्र्यांची भेट घेऊन द्विपक्षीय चर्चा केली. संयुक्त राष्ट्राचे सरचिटणीस ऍन्टोनिओ गुटेरेस, संयुक्त राष्ट्राच्या महासभेचे नवीन अध्यक्ष फिलेमोंग यांग यांची जयशंकर यांनी स्वतंत्र्पणे भेट घेतली. यावेळी पश्चिम आशियातील संघर्ष आणि युद्धाच्या मुद्यावर विचारांची आदानप्रदान करण्यात आली. वैविध्यतेत एकता, शांतता आणि मानवी स्थायीभाव आदी मुद्यांवर यांग यांच्या विचारांशी जयशंकर यांनी सहमती दर्शवली. संयुक्त राष्ट्राच्या भविष्यासाठीच्या परिषदेत जागतिक नेत्यांनी १५ सदस्यीय सुरक्षा परिषदेत सुधारणा करण्यासंबंधीचा ठराव एकमताने मंजूर केला आहे. सुरक्षा परिषदेला अधिक प्रातिनिधीक, सर्वसमावेशक, पारदर्शक, प्रभावी, परिणामकारक, लोकशाही आणि उत्तरदायी बनवण्यासाठी या परिषदेत तातडीने सुधारणांची गरज असल्याचे या ठरावात म्हटले आहे. संयुक्त राष्ट्राचे सध्याचे सदस्यत्व आणि सद्यस्थितीतील वस्तुनिष्ठतेला अनुसरून सुरक्षा परिषदेला अधिक व्यापक करण्यासही मान्यता देण्यात आली आहे. दरम्यान संयुक्त राष्ट्राच्या महासभेच्या निमित्ताने जयशंकर यांनी बेलारुसचे परराष्ट्र मंत्री मॅक्सिम रायझेनकोव्ह, रोमानियाचे परराष्ट्र मंत्री लुमिनिता ओडोबेस्कू, स्वीडनच्या परराष्ट्र मंत्री मारिया माल्मर स्टेनरगार्ड मॉन्टेनेग्रोचे उपपंतप्रधान आणि परराष्ट्र मंत्री एर्विन इब्राहिमोविक, मोरोक्कोचे परराष्ट्र मंत्री नासेर बोरिटा, इजिप्तचे परराष्ट्र मंत्री बद्र अब्देलट्टी, जॉर्डनचे परराष्ट्र मंत्री आयमन सफादी यांची भेट घेतली आणि विविध मुद्यांवर त्यांच्याशी चर्चा केली.
