बीड – बीडमधील संतोष देशमुख प्रकरणानंतर फक्त बीडच नव्हे तर संपूर्ण राज्यभरात खळबळ माजली आहे. या प्रकरणातील सर्व आरोपींवर मोक्‍का अंतर्गत गुन्हा दाखल करण्यात आला आहे. या प्रकरणातील काही आरोपी राष्ट्रवादी काँग्रेसशी संबंधित असल्याचे सांगितले जात आहे. त्यामुळे राष्ट्रवादीची प्रतिमा मलिन होत आहे. या प्रकरणामुळे अजित पवारांनी राष्ट्रवादी काँग्रेसची संपूर्ण बीड जिल्हा कार्यकारिणी बरखास्त केली आहे. या प्रकारे बीडमधील राष्ट्रवादीचे नेते आणिम मंत्री धनंजय मुंडे यांना पहिला राजकीय धक्‍का बसल्‍याचे मानले जात आहे.

राष्ट्रवादी काँग्रेस अजित पवार पक्षाची बीड जिल्हा कार्यकारिणी बरखास्त करण्यात आली आहे. संतोष देशमुख यांच्या हत्या प्रकरणातील आरोपी विष्णू चाटे हा राष्ट्रवादी काँग्रेसचा तालुकाध्यक्ष होता. या हत्या प्रकरणात विष्णू चाटेचे नाव आल्यानंतर त्याला तातडीने निलंबित करण्यात आले होते. त्यानंतर राष्ट्रवादीचे प्रदेशाध्यक्ष सुनील तटकरे यांनी आता बीड जिल्ह्यातील कार्यकारिणी बरखास्त करण्याचा निर्णय घेतला. तसेच तालुक्याची जी कार्यकारिणी होती, तीदेखील बरखास्त करण्यात आली आहे.

राष्ट्रवादी काँग्रेसचे अध्यक्ष अजित पवार यांच्या उपस्थितीत बीड जिल्ह्याचे पक्षाचे अध्यक्ष राजेश्वर चव्हाण, माजी आमदार संजय दौंड आणि इतर प्रमुख पदाधिकारी यांच्यासोबत बैठक पार पडली. या बैठकीमध्ये बीड जिल्ह्यातील स्थानिक परिस्थितीचा आढावा अजित पवार यांनी घेतला. त्याचसोबत वाल्मिक कराड यांना मोक्का लागल्यानंतर परळी बंदची हाक देण्यात आली होती. अनेक हिंस्त्र आंदोलने कार्यकर्त्यांकडून करण्यात आली होती. त्यासंदर्भातील माहिती त्‍यांनी जाणून घेतली. या बैठकीनंतर मंत्री धनंजय मुंडे यांनी अजित पवार यांची देवगिरी या निवासस्थानी भेट घेतली.

जिल्हाध्यक्ष आणि तालुका अध्यक्षांची निवड होईपर्यंत जिल्हाध्यक्ष म्हणून राजेश्वर चव्हाण हेच काम पाहतील, असे सुद्धा राष्ट्रवादी काँग्रेस पक्षाकडून कळवण्यात आले आहे. तसेच यापुढे तालुका अध्यक्ष आणि जिल्हाध्यक्ष यांच्या चारित्र्याची पडताळणी करूनच नेमणुका कराव्या अशा सूचना राजेश्वर चव्हाण यांना देण्यात आल्या आहेत.