Delhi hotel fire : दक्षिण दिल्लीतील मालवीय नगर परिसरातील एका हॉटेल-कम-गेस्ट हाऊसमध्ये बुधवारी सकाळी लागलेल्या भीषण आगीत किमान 21 जणांचा होरपळून मृत्यू झाला, तर अनेक जण गंभीर जखमी झाले. मृतांमध्ये 15 हून अधिक परदेशी नागरिकांचा समावेश असल्याची माहिती पोलिसांनी दिली. या दुर्घटनेत 40 हून अधिक जणांची सुटका करण्यात आली आहे.

प्रत्यक्षदर्शींनी दिलेल्या माहितीनुसार, इमारतीच्या मुख्य प्रवेशद्वारावर इलेक्ट्रॉनिक लॉक असलेले गेट होते. आग लागल्यानंतर वीजपुरवठा खंडित झाल्याने हे गेट जाम झाले आणि आत अडकलेल्या लोकांना बाहेर पडता आले नाही. आग तळमजला आणि पहिल्या मजल्यावर लागल्याने वरच्या मजल्यांवरील रहिवासी पूर्णपणे अडकून पडले.

आगीची माहिती मिळताच परिसरातील नागरिक मदतीसाठी धावले. त्यांनी खिडक्यांच्या काचा दगड व विटांच्या सहाय्याने फोडल्या, जेणेकरून आत अडकलेल्या लोकांना बाहेर पडण्याचा मार्ग मिळू शकेल. तसेच जवळील हॉटेलमधून गाद्या आणून इमारतीखाली टाकण्यात आल्या. अनेकांनी जीव वाचवण्यासाठी दुसऱ्या, तिसऱ्या आणि चौथ्या मजल्यावरून उड्या मारल्या.

स्थानिक रहिवासी मन्सूर यांनी सांगितले की, सकाळी सुमारे 8 वाजता इमारतीतून ‘बचाओ, बचाओ’ अशा किंकाळ्या ऐकू येत होत्या. गेट बंद झाल्यामुळे लोक अडकून पडले होते. काही परदेशी नागरिक चौथ्या मजल्यावर अडकले होते. त्यांना वाचवण्यासाठी समोरील इमारतीवरून दोरी टाकण्यात आली. एका महिलेने दोरी पकडली होती; मात्र तिचा तोल गेला आणि ती खाली टाकलेल्या गादीवर पडली. त्यामुळे तिचा जीव वाचला.

प्रत्यक्षदर्शींनी सांगितलं नेमकं काय घडलं?

शेर खान या स्थानिक रहिवाशाने सांगितले की, सुरुवातीला आग लहान स्वरूपाची वाटत होती; मात्र काही वेळातच ती संपूर्ण इमारतीत पसरली. बचावाचा कोणताही मार्ग उरला नसल्याने अनेकांना खिडक्यांतून उड्या माराव्या लागल्या. एका महिलेचा पाय तुटल्याचे त्यांनी सांगितले.

ओम नावाच्या अन्य प्रत्यक्षदर्शीने सांगितले की, सकाळी साडेनऊच्या सुमारास संपूर्ण इमारत आगीच्या विळख्यात होती. लोक विविध बाजूंनी खाली उड्या मारत होते. काहींचे गंभीर दुखापतींसह प्राण वाचले.

अनीता चौधरी यांनी सांगितले की, आगीदरम्यान अनेक स्फोटांसारखे आवाज ऐकू आले. त्यानंतर इमारतीतून मदतीसाठी आक्रोश सुरू झाला. परिसरातील नागरिकांनी तत्काळ धाव घेत बचावकार्य सुरू केले.

संजय गोयल यांनी सांगितले की, इमारतीतून दाट धूर बाहेर येताना दिसताच नागरिकांनी खिडक्यांच्या काचा फोडून अडकलेल्यांना बाहेर काढण्याचा प्रयत्न केला. अग्निशमन दल पोहोचण्यापूर्वी स्थानिकांनी शक्य ती सर्व मदत केली.

एका प्रत्यक्षदर्शीने सांगितले की, एका महिलेने आपल्या लहान मुलाला घेऊन तिसऱ्या मजल्यावरून उडी मारली. खाली टाकलेल्या गादीवर ती पडल्याने तिचा आणि मुलाचा जीव वाचला. त्यानंतर दोघांनाही तातडीने रुग्णालयात दाखल करण्यात आले.

हा परिसर मोठ्या रुग्णालयांच्या जवळ असल्याने उपचारासाठी येणारे परदेशी नागरिक येथे मोठ्या प्रमाणात वास्तव्यास असतात. त्यामुळे दुर्घटनेतील मृतांमध्ये परदेशी नागरिकांची संख्या अधिक असल्याचे सांगितले जात आहे.

दक्षिण दिल्लीचे पोलिस उपायुक्त अनंत मित्तल यांनी सांगितले की, सकाळी 8.48 वाजता आगीची माहिती मिळाल्यानंतर पोलिस, अग्निशमन दल आणि अन्य आपत्कालीन यंत्रणा तातडीने घटनास्थळी पोहोचल्या. बचाव व शोधमोहीम अद्याप सुरू असून सर्व संबंधित यंत्रणा मदतकार्य करत आहेत.