प्रभात वृत्तसेवा बारामती – बारामती तालुक्यात वाहतूक सुरक्षाविषयक नियमांच्या अनुषंगाने उप प्रादेशिक परिवहन अधिकारी कार्यालयामार्फत दि. २७ ते ३० जुलै या कालावधीत केलेल्या कारवाईत साडेआठ लाख रुपयांहून अधिक दंड वसूल केला आहे. उप प्रादेशिक परिवहन अधिकारी कार्यालयामार्फत वाहनमालक वा वाहनचालकांकडून वाहतूक सुरक्षाविषयक नियमांचे उल्लंघन झाल्याबद्दल विविध ५५ प्रकरणांत ही कारवाई करण्यात आली आहे.कारवाईत क्षमतेपेक्षा अधिक वजन भरल्याबद्दल (ओव्हलोड) १७ प्रकरणांत ७ लाख ७२ हजार रुपये, योग्यता प्रमाणपत्र नसन्याच्या अनुषंगाने ७ प्रकरणात १४ हजार, विमा प्रमाणपत्राच्या ३ प्रकरणांत ४ हजार ५०० रुपये वसूल करण्यात आले आहेत. नोंदणी क्रमांकाच्या अनुषंगाने २ प्रकरणांत २ हजार रुपये, परावर्तिका लावली नसणे या अनुषंगाने ३ प्रकरणात ३ हजार रुपये, काळी काच असलेल्या २ वाहनांकडून १० हजार ५००, वाहन कर न भरलेली २ वाहनांकडून २ हजार, प्रदूषण प्रमाणपत्र नसलेल्या 6 प्रकरणांत ४ हजार ५००, अनुज्ञप्ती नसलेल्या १० वाहनचालकांकडून ५ हजार रुपये तसेच शालेय विद्यार्थी वाहतूक बसच्या नियमांचे उल्लंघन केलेल्या ३ प्रकरणांत ४२ हजार रुपये असा एकूण ८ लाख ५९ हजार ५०० रुपये इतका दंड आकारला आहे. उप प्रादेशिक परिवहन अधिकारी कार्यालयामार्फत मोहीमस्तरावर वाहनांची तपासणीचे काम सुरु आहे. नागरिक तसेच विद्यार्थी वाहतूक करणाऱ्यांना वाहनचालकांनी वाहतूक सुरक्षाविषयक नियमाचे पालन करुन प्रशासनास सहकार्य करावे, असे आवाहन उप प्रादेशिक परिवहन अधिकारी सुरेंद्र निकम यांनी केले आहे.
