मुंबई – मराठमोळा दिग्दर्शक ओम राऊत यांच्या बहुप्रतिक्षित ‘आदिपुरुष’ या सिनेमाची सध्या जोरदार चर्चा सुरु आहे. नुकताच ‘आदिपुरुष’ सिनेमाचा ट्रेलर प्रदर्शित झाला आहे. या सिनेमात दाक्षिणात्य अभिनेता प्रभास हा प्रभू श्रीरामांच्या भूमिकेत दिसला आहे. तर, अभिनेत्री क्रिती सेनॉन सीतेचे पात्र साकारत आहे. रावणाचे पात्र सैफ अली खान साकारत आहे.
तर हनुमानाचे पात्र देवदत्त नागे साकारत आहे. हैदराबादमध्ये ‘आदिपुरुष’ या सिनेमाच्या ट्रेलरचे खास स्क्रीनिंग करण्यात आले होते. त्यानंतर आता चाहत्यांसाठी या सिनेमाचा ट्रेलर प्रदर्शित करण्यात आला असून, सध्या सोशल मीडियावर ट्रेलरला तुफान प्रतिसाद मिळत असल्याचं दिसत आहे.
दरम्यान, ट्रेलरच्या सुरुवातीला हनुमान हा गुहेत तपश्चर्या करत असल्याचे दिसत आहे. त्यानंतर मग श्रीराम, लक्ष्मण हे सीतेसह वनवासात जात असल्याचे देखील दिसून आले आहे. राम आणि लक्ष्मण शबरीने दिलेली उष्टी बोरे खाताना दिसत आहेत.
तसेच लक्ष्मणाची प्रकृती ठीक व्हावी यासाठी द्रोणागिरी पर्वत उचलून आणण्यापासून ते राम-लक्ष्मण वानरसेनेसह रामसेतूवरून लंकेला जाताना सर्व गोष्टींची झलक यामध्ये दाखवण्यात आली आहे. या ट्रेलरचा सर्वात शेवटी रावणाची झलक दाखवण्यात आली आहे.
दरम्यान, गेल्या वर्षी दसऱ्याच्या मुहूर्तावर या सिनेमाचा टीझर प्रदर्शित करण्यात आला होता. पण या सिनेमाचा टीझर बघून यामध्ये दाखवल्या गेलेल्या दृश्यांमुळे या सिनेमावर टीका केली गेली आहे. या टीकेनंतर या सिनेमाच्या निर्मात्यांनी प्रदर्शनाची तारीख पुढे ढकलली आहे. आता हा सिनेमा 16 जून रोजी प्रदर्शित होणार आहे.