Ajit Pawar : पुणे महापालिका निवडणुकीसाठी दोन्ही राष्ट्रवादी एकत्र येणार असल्याच्या चर्चांना उधान आले होते. पण दोन्ही राष्ट्रवादी काँग्रेसची युतीची चर्चा फिसकटली असून, अंतिम निर्णय काय घेतला जाणार याकडे सर्वांचे लक्ष लागलेले आहे. अशातच पुण्याला लागून असलेल्या पिंपरी चिंचवड महापालिका निवडणुकीसाठी दोन्ही राष्ट्रवादी पक्ष एकत्र निवडणुका लढणार आहेत. याबाबत उपमुख्यमंत्री आणि राष्ट्रवादी काँग्रेस पक्षाचे राष्ट्रीय अध्यक्ष अजित पवार यांनी घोषणा केली आहे. गेल्या काही दिवसांपूर्वी पुणे महापालिका निवडणुकीसाठी पुण्यात अजित पवार यांच्या बंगल्यावर शरद पवार यांच्या राष्ट्रवादी काँग्रेसचे खासदार अमोल कोल्हे आणि आमदार रोहित पवार यांच्यात बैठक पार पडली होती. मात्र जागांसंदर्भात एकमत न झाल्याने केवळ चर्चाच अंतिम झाली. यामुळे पुण्यासाठी दोन्ही राष्ट्रवादी एकत्र येणार असल्याचा सस्पेन्स संपलेला नाही. पुण्यासाठी दोन्ही राष्ट्रवादी एकत्र येणार की नाही याबाबतची अंतिम घोषणा आज होऊ शकते. पिंपरी चिंचवड हा राष्ट्रवादी काँग्रेस पक्षाच्या बालेकिल्ला समजलो जातो. २०१७ च्या महापालिका निवडणुकीत भाजपने दणदणीत विजय मिळवत राष्ट्रवादीच्या बालेकिल्लात शिरकाव केला. अजित पवारांनी केली घोषणा “पिंपरी चिंचवडमध्ये निवडणुका लढवत असताना राष्ट्रवादी काँग्रेस म्हणजे घड्याळ आणि तुतारी एकत्रित सामोरे जात आहे. त्यामुळे हा परिवार पुन्हा एकत्र येण्याचं काम होत आहे. बऱ्याच जणांच्या मनात हेच होतं. त्यामुळे महापालिका निवडणूक दोन्ही राष्ट्रवादी काँग्रेसने एकत्र लढण्याचा निर्णय घेतला आहे.” हे विधान करून अजित पवारांनी दोन्ही राष्ट्रवादी काँग्रेस एकत्र पिंपरी चिंचवड महापालिका निवडणुकीला समोरे जाणार असल्याचे स्पष्ट झाले आहे. या निवडणुकीत शरद पवारांचे उमेदवार तुतारी तर अजित पवारांचे उमेदवार घड्याळ या चिन्हावर निवडणूक लढणार असल्याचे स्वतः अजित पवार यांनी केलेल्या विधानातून स्पष्ट झाले आहे. त्यामुळे दोन्ही राष्ट्रवादी पिंपरी चिंचवडमध्ये एकत्र येणार असल्याचा संपेन्स संपला आहे. मिळालेल्या माहितीनुसार, आज दोन्ही राष्ट्रवादी काँग्रेस पक्षांच्या उमेदवारांची यादी जाहीर केले जाणार असल्याचे सांगण्यात आले आहे. तर भाजपकडून पिंपरी चिंचवड महानगरपालिकेत स्वबळाचा नारा देण्यात आला आहे. १२५ जागांवर विजय मिळविण्याचा निर्धार भाजपने केला आहे. हेही वाचा : उद्धव ठाकरेंचे २८ शिलेदार निवडणुकीच्या रिंगणात! मुंबई महापालिकेसाठी उबाठा गटाची पहिली यादी जाहीर
