पनवेल : अश्विनी बिद्रे हत्याप्रकरणी सोमवारी पनवेल कोर्टाने मुख्य आरोपी अभय कुरुंदकरला जन्मठेपेची शिक्षा सुनावली. तसेच या प्रकरणातील सहआरोपी महेश फळणीकर आणि कुंदन भंडारीला सात वर्षाची शिक्षा सुनावण्यात आली आहे. अश्विनी बिद्रेची हत्या अत्यंत क्रुरपणे करण्यात आल्याचे म्हणत कोर्टाने आरोपींना शिक्षा सुनावली आहे. अश्विनी बिद्रे यांची २०१६ साली त्यांचे सहकारी, वरिष्ठ पोलिस निरीक्षक अभय कुरुंदकर यांनी हत्या केली होती. गेल्या ९ वर्षांपासून हा खटला सुरू होता.

सहायक पोलिस निरीक्षक अश्विनी बिद्रे हत्याकांडातील मुख्य आरोपी बडतर्फ वरिष्ठ पोलिस निरीक्षक अभय कुरुंदकर याला आणि त्याचे सहकारी कुंदन भंडारी आणि महेश फळणीकर या तिघांना अतिरिक्त सत्र न्यायाधीश के. जी. पालदेवार यांनी ५ एप्रिल रोजी दोषी ठरवले होते. मात्र त्यानंतर निकाल राखून ठेवला होता. सोमवारी हा निकाल सुनावण्यात आला. यावेळी बिद्रे हत्याकांड हे दुर्मिळातील दुर्मिळ प्रकरण असल्याचे मत न्यायालयाने नोंदवले होते. प्रकरणातील आरोपी राजू पाटील याची मात्र न्यायालयाने सबळ पुराव्याअभावी निर्दोष मुक्तता केली.

नवी मुंबईत सहाय्यक पोलीस निरीक्षक म्हणून कार्यरत असलेल्या अश्विनी भिडे या २०१५ मध्ये अचानक बेपत्ता झाल्या. त्यानंतर तपासाअंती बिद्रे यांची अत्यंत क्रुर पद्धतीने हत्या करण्यात आल्याचे समोर आले होते. त्यांच्या मृतदेहाचे तुकडे करण्यात आले आणि ते आरोपी अभय कुरुंदकर याने भाईंदरच्या खाडीत टाकून पुरावे नष्ट केले.

आरोपी स्वत: एक पोलिस अधिकारी असल्यामुळे त्याने आपल्या कौशल्याचा वापर करून सगळे पुरावे नष्ट करण्याचा प्रयत्न केला.आरोपी कुरुंदकर याचे अश्विनी बिद्रे यांच्यात संबंध होते. त्याच्यातून निर्माण झालेल्या संघर्षामुळे त्यांची हत्या करण्यात आल्याचे आरोपपत्रात नमूद केले गेले. अभय कुरुंदकर यानेच अश्विनी बिद्रे यांची हत्या केल्याचे तसेच त्याने बनावट रेकॉर्ड तयार करून वरिष्ठांची दिशाभूल केल्याचे परिस्थितीजन्य पुराव्यातून स्पष्ट झाले आहे.

हत्येनंतर महेश फळणीकरने गोणीत भरलेला अश्विनीचा मृतदेह भाईंदरच्या खाडीत टाकण्यास मदत केली.तसेच भाईंदरच्या ज्या घरात कुरुंदकरने अश्विनीचे तुकडे केले, तेथे भिंतीवरील रक्ताचे डाग पुसण्यासाठी भंडारीने ती रंगवून घेतली. न्यायालयाने कुंदन भंडारी व महेश फळणीकर यांना पुरावा नष्ट करण्यास मदत केल्याबद्दल दोषी ठरवले होते.