नवी दिल्ली – ऐन उत्सवाअगोदर जीएसटी कपातीच्या फक्त घोषणेमुळे वितरण पातळीवर नकारात्मक परिस्थिती निर्माण झाली आहे. ग्राहक वाहन खरेदी करीत नाहीत. अशा परिस्थितीत जर जीएसटी कपातीच्या अंमलबजावणी उशीर झाला तर उत्सवाच्या काळात विक्री ठप्प होण्याची म्हणजे व्हाइटवॉश होण्याची भीती फेडरेशन ऑफ ऑटोमोबाईल डीलर्स असोसिएशन या संघटनेने व्यक्त केली आहे. तसे पत्र या संघटनेने वाणिज्य मंत्री पियुष गोयल यांना पाठविले आहे. आनम सन 26 ऑगस्टला, गणेश चतुर्थी 27 ऑगस्टला आणि नवरात्री व दिवाळी 8 ते 23 ऑक्टोबर दरम्यान साजरी होणार आहे. यासाठी दरवर्षाप्रमाणे वितरक भांडवल गुंतवून इन्व्हेंटरी निर्माण करीत असतात. मात्र जीएसटी कपातीच्या फक्त घोषणामुळे ग्राहक सध्या खरेदी करीत नाहीत. यासाठी जीएसटी परिषदेने आणि केंद्र सरकारने शक्य तितक्या लवकर या घोषणेची अंमलबजावणी करण्यासाठी समन्वयाने प्रयत्न करण्याची गरज आहे. या कालावधीत बँक आणि बिगर बँकिंग वित्तीय संस्थांनी वितरकांना समजूतदारपणे आवश्यक ती मदत करण्याची गरज असल्याचे मतही या संघटनेने व्यक्त केले आहे. वाहनावर सध्या 28 ते 40% जीएसटी लागतो. कपाती नंतर हा जीएसटी बराच कमी होणार आहे, असे ग्राहकांना वाटत आहे. मात्र प्रत्यक्ष घोषणा झालेली नाही.
