FDA Raid : गणेशोत्सवाच्या पार्श्वभूमीवर पुण्यात अन्न व औषध प्रशासनाने (FDA) मोठी कारवाई केली आहे. पहाटे सहा वाजता पुण्यात दाखल झालेल्या पनीर आणि खव्याच्या वाहनांची FDAच्या पथकाने तपासणी केली. या कारवाईत तब्बल १२ हजार ५०० किलो पनीर आणि सुमारे ११ लाख रुपये किमतीचा खवा जप्त करण्यात आला आहे.  (FDA Raid)

जप्त करण्यात आलेल्या पनीरची किंमत सुमारे २७ लाख रुपये असल्याची माहिती अधिकाऱ्यांनी दिली. पनीरचा साठा कर्नाटकातून, तर खवा वाशी येथून पुण्यात आणण्यात आल्याचे समोर आले आहे. प्राथमिक माहितीनुसार, हा साठा पुण्यातील तब्बल २० ते २५ विक्रेत्यांना पुरवठा केला जाणार होता. (FDA Raid)

 

दरम्यान, जप्त केलेल्या साठ्याची बिले आणि इतर आवश्यक कागदपत्रांची FDAकडून तपासणी करण्यात येणार आहे. कागदपत्रांमध्ये अनियमितता आढळल्यास संबंधितांवर कारवाई केली जाणार आहे. तसेच तपासणीत दोषी आढळणाऱ्यांविरोधात कायदेशीर कारवाई करण्यात येईल, अशी माहिती FDA अधिकारी निलेश मसारे यांनी दिली. ( FDA Raid)

दरम्यान, गणेशोत्सवात मिठाई आणि खाद्यपदार्थांची मागणी वाढत असल्याने भेसळ रोखण्यासाठी एफडीएकडून विशेष मोहीम राबवली जात आहे. या कारवाईमुळे पुण्यातील खाद्य व्यावसायिकांमध्ये खळबळ उडाली आहे.