FDA In Lonavala : लोणावळयात एफडीएची कारवाई; चार नामांकित हॉटेल्सचे अन्न परवाने निलंबित
मुदतबाह्य खाद्यपदार्थ, अस्वच्छ स्वयंपाकघर

पिंपरी – ग्राहकांच्या आरोग्याशी तडजोड करणाऱ्या आणि अन्नसुरक्षा नियमांचे उल्लंघन करणाऱ्या हॉटेल्स आणि रेस्टॉरंट्सविरोधात अन्न व औषध प्रशासनाने (एफडीए) कारवाईचा बडगा उगारला आहे.
सेफ फूड, सेफ महाराष्ट्र या विशेष मोहिमेअंतर्गत लोणावळा परिसरातील प्रमुख हॉटेल्स आणि रेस्टॉरंट्सची तपासणी करण्यात आली. या कारवाईत चार नामांकित हॉटेल्सचे अन्न परवाने निलंबित करण्यात आले आहेत. मुदतबाह्य खाद्यपदार्थ, अस्वच्छ स्वयंपाकघर, अन्नपदार्थांच्या साठवणुकीतील त्रुटी आणि स्वच्छतेच्या नियमांकडे दुर्लक्ष केल्याचे तपासणीत आढळले.
अन्न व औषध प्रशासनाच्या पुणे विभागाच्या पथकाने बुधवारी (दि. १८) लोणावळा परिसरातील प्रमुख हॉटेल्स आणि रेस्टॉरंट्सची अचानक तपासणी केली. या वेळी चार आस्थापनांचे अन्न परवाने निलंबित करण्यात आले. तसेच ग्राहकांच्या आरोग्याशी तडजोड करणाऱ्या आणि अन्न सुरक्षा कायद्याचे उल्लंघन करणाऱ्या कोणत्याही आस्थापनांची गय केली जाणार नाही.
सर्व हॉटेल आणि खाद्यपदार्थ व्यावसायिकांनी परवान्याच्या अटी, स्वच्छता तसेच अन्न साठवणुकीच्या नियमांचे काटेकोर पालन करावे. अन्यथा अन्न परवाना निलंबित किंवा रद्द करण्यासारखी कठोर कारवाई केली जाईल, असा इशारा प्रशासनाकडून देण्यात आला आहे.
कारवाई दरम्यान वलवण येथील द ऑर्किड हॉटेल येथे तपासणीदरम्यान स्वयंपाकघरात मुदतबाह्य दुधाची पाकिटे आढळली. तसेच कच्चे आणि शिजवलेले अन्नपदार्थ एकत्र ठेवण्यात आले होते. स्वयंपाकघरात अस्वच्छता होती. तर कर्मचाऱ्यांकडेही आवश्यक संरक्षक कपडे नसल्याचे आढळले. रिदम लोणावळा या हॉटेलच्या मुख्य स्वयंपाकघर आणि बेकरी विभागातील फ्रीजजवळ झुरळांचा वावर आढळला.
शाकाहारी, मांसाहारी, कच्चे आणि शिजवलेले अन्नपदार्थ स्वतंत्रपणे साठवले जात नव्हते. अन्नपदार्थांच्या पाकिटांवर आवश्यक लेबल लावलेले नव्हते. तसेच फ्रीजमधील साहित्य आणि परिसराच्या स्वच्छतेकडे दुर्लक्ष झाल्याचे तपासणीत दिसून आले.
जुना पुणे-मुंबई महामार्गावरील बेसिलिका हॉटेलमध्ये देखील कोल्ड स्टोरेजमध्ये मुदतबाह्य झालेले चीज आणि ब्रेडचे प्रकार आढळले. हे पदार्थ एफडीएच्या पथकाने नष्ट केले. शाकाहारी आणि मांसाहारी पदार्थांसाठी स्वतंत्र कप्पे, भांडी आणि फ्रीजची व्यवस्था नव्हती. स्वयंपाकघरात खाद्य रंग आणि अजिनोमोटोचा वापर होत असल्याचे आढळले.
मात्र, मेनू कार्डवर त्याबाबत माहिती नमूद केलेली नव्हती. याशिवाय कामगारांची वैद्यकीय प्रमाणपत्रे, पेस्ट कंट्रोल अहवाल आणि वापरलेल्या तेलासंदर्भातील नोंदी उपलब्ध नसल्याचे आढळले. द फर्न हॉटेल येथे बेकरी उत्पादने तयार करण्यासाठी मुदतबाह्य खाद्य रंगांचा वापर होत असल्याचे आढळले.
अन्नपदार्थांच्या सुरक्षिततेसाठी तपासणी
हॉटेल्स आणि रेस्टॉरंट्समध्ये तयार होणारे तसेच ग्राहकांना दिले जाणारे अन्न सुरक्षित असणे आवश्यक आहे. त्यासाठी अन्नपदार्थांची योग्य साठवणूक, स्वच्छ स्वयंपाकघर, कर्मचाऱ्यांची वैयक्तिक स्वच्छता आणि मुदतबाह्य पदार्थांचा वापर टाळणे या बाबी महत्त्वाच्या आहेत. सेफ फूड, सेफ महाराष्ट्र मोहिमेच्या माध्यमातून अशा नियमांचे उल्लंघन करणाऱ्या आस्थापनांची तपासणी करून कारवाई केली जात आहे.





