नवी दिल्ली – आज स्वातंत्र्यदिनाच्या खास प्रसंगी देशवासियांना आणखी एक खास भेट मिळाली आहे. केंद्रीय रस्ते वाहतूक आणि महामार्ग मंत्री नितीन गडकरी यांनी काही महिन्यांपूर्वी जाहीर केलेला फास्टॅग वार्षिक पास आजपासून सुरू झाला आहे. या योजनेच्या माध्यमातून वाहनचालकांना राष्ट्रीय महामार्ग आणि NHAI अंतर्गत येणाऱ्या टोल प्लाझावर 3,000 रुपयांत वार्षिक पास मिळणार आहे. यामुळे प्रवाशांना 200 टोल-मुक्त प्रवासाचा आनंद घेता येणार आहे. विशेष म्हणजे, यामुळे प्रति टोलचा खर्च 50 रुपयांवरून थेट 15 रुपयांपर्यंत कमी होणार आहे. चला जाणून घेऊया, हा पास कसा खरेदी करायचा, याचे फायदे काय आणि तो कुठे-कुठे वापरता येणार?

फास्टॅग वार्षिक पास कसा खरेदी कराल?

फास्टॅग वार्षिक पास खरेदी करण्यासाठी Rajmarg Yatra App किंवा राष्ट्रीय महामार्ग प्राधिकरण (NHAI) च्या अधिकृत वेबसाइटचा वापर करावा लागेल.

पास खरेदीची प्रक्रिया अतिशय सोपी आहे:

1. सर्वप्रथम गुगल प्ले स्टोअर किंवा ॲपल स्टोअरवरून Rajmarg Yatra App डाउनलोड करा.
2. ॲपमध्ये आवश्यक तपशील भरा आणि 3,000 रुपये शुल्काचा भरणा करा.
3. पेमेंटची पुष्टी झाल्यावर पास तुमच्या नोंदणीकृत फास्टॅगवर त्वरित सक्रिय होईल.

विशेष बाब म्हणजे, नवीन फास्टॅग खरेदी करण्याची गरज नाही. तुमच्या विद्यमान फास्टॅगवरच हा पास सक्रिय करता येईल.

एका पासचा वापर किती वाहनांसाठी?
फास्टॅग वार्षिक पास केवळ त्या वाहनासाठी वैध असेल, ज्या वाहनाच्या नोंदणीसह फास्टॅग लिंक केलेले आहे. दुसऱ्या वाहनासाठी याचा वापर केल्यास पास बंद होण्याची शक्यता आहे. तसेच, फास्टॅग वाहनाच्या विंडशील्डवर योग्यरित्या लावले नसल्यास ते ब्लॅकलिस्ट होण्याचा धोका आहे.

किंमत आणि मर्यादा

– फास्टॅग वार्षिक पासची किंमत: 3,000 रुपये
– वैधता: एक वर्ष किंवा 200 प्रवास (यापैकी जे आधी पूर्ण होईल)
– फायदा: टोल शुल्क 50 रुपयांवरून 15 रुपये प्रति प्रवास
– पासची मर्यादा संपल्यावर तो पुन्हा रिन्यू करावा लागेल.

कुठे वापरता येईल हा पास?

हा वार्षिक पास NHAI आणि रस्ते वाहतूक मंत्रालय अंतर्गत येणाऱ्या राष्ट्रीय महामार्ग आणि एक्सप्रेस-वेवरील टोल प्लाझावर वापरता येईल. मात्र, राज्य महामार्ग किंवा महानगरपालिकेच्या टोल रस्त्यांवर हा पास वापरता येणार नाही. अशा ठिकाणी तुम्हाला नेहमीप्रमाणे स्वतंत्रपणे टोल शुल्क भरावे लागेल.

200 प्रवासाची गणना कशी होईल?

– प्रत्येक टोल प्लाझा ओलांडणे हा एक प्रवास मानला जाईल.
– येणे-जाणे (राउंड ट्रिप) हे दोन प्रवास गणले जाईल.
– जर टोल बंद असेल, तर येणे-जाणे एकच प्रवास मानले जाईल.
– 200 प्रवास पूर्ण झाल्यावर पासची वैधता संपेल आणि तो पुन्हा सक्रिय करावा लागेल.

कोणासाठी फायदेशीर?
हा वार्षिक पास विशेषतः अशा व्यक्तींसाठी फायदेशीर आहे, जे वर्षभरात सुमारे 2,500 ते 3,000 किलोमीटर टोल रस्त्यांवर प्रवास करतात. यामुळे टोल प्लाझावरील गर्दी कमी होईल, वादविवाद टळतील आणि प्रवासाचा अनुभव अधिक सुलभ होईल.

कोणत्या वाहनांसाठी उपलब्ध?
हा पास फक्त खासगी वाहनांसाठी (जसे की कार, जीप आणि व्हॅन) उपलब्ध आहे. जर याचा वापर व्यावसायिक वाहनांसाठी केला गेला, तर पास तात्काळ बंद केला जाईल.

केंद्रीय मंत्री नितीन गडकरी यांच्या मते, फास्टॅग वार्षिक पास योजना राष्ट्रीय महामार्गावरील 60 किलोमीटरच्या परिघातील टोल प्लाझांवरील अडचणी आणि जास्त शुल्काची समस्या दूर करेल. यामुळे टोल पेमेंट सुलभ होईल, टोल प्लाझावरील प्रतीक्षा वेळ कमी होईल आणि गर्दीमुळे होणाऱ्या त्रासाला आळा बसेल.

ही योजना प्रवाशांसाठी एक मोठा दिलासा ठरणार असून, राष्ट्रीय महामार्गांवरील प्रवास अधिक किफायतशीर आणि त्रासमुक्त करेल.