मुंबई : यंदा सरासरीपेक्षा 7 ते 17 टक्के जास्त पाऊस पडण्याचा अंदाज हवामान खात्याने वर्तवला आहे. यामुळे शेती उत्पादकता वाढण्याची शक्यता असून, बोगस बियाणांपासून बचावासाठी शेतकऱ्यांनी केंद्र सरकारच्या ‘साथी’ पोर्टलचा वापर करावा, असे आवाहन मुख्यमंत्री देवेंद्र फडणवीस यांनी केले. तसेच, शेतीसंबंधी सविस्तर माहितीसाठी ‘महाविस्तार’ अॅपचा जास्तीत जास्त वापर करण्याचेही त्यांनी सांगितले. चांगला पाऊस, पुरेसा बियाणे-खत पुरवठा – मुख्यमंत्री फडणवीस यांनी पत्रकार परिषदेत सांगितले की, हवामान खात्याने पावसाच्या दोन खंडांमधील अंतर कमी राहण्याचा अंदाज व्यक्त केला आहे. राज्यात बियाणे आणि खतांचा पुरवठा पुरेसा राहील, याची खात्री सरकारने दिली आहे. मागील वर्षाचा अनुभव लक्षात घेऊन कोणते पीक घ्यावे, याबाबत शेतकऱ्यांना मार्गदर्शन केले जाईल. ‘साथी’ पोर्टलवर बियाणांची नोंदणी बंधनकारक – बोगस बियाण्यांच्या विक्रीला आळा घालण्यासाठी केंद्र सरकारच्या ‘साथी’ पोर्टलवर बियाणांची नोंदणी बंधनकारक करण्यात आली आहे. या पोर्टलद्वारे बियाणांचे उत्पादन आणि विक्रीचा मागोवा घेतला जाईल. यामुळे बियाणे फसवणुकीला आळा बसेल, असे मुख्यमंत्र्यांनी स्पष्ट केले. खतांच्या लिंकिंगवर कडक कारवाई – खतांच्या अनुदानित विक्रीत गैरव्यवहार टाळण्यासाठी कडक पावले उचलली जातील. प्रत्येक खत विक्री दुकानासमोर माहिती फलक लावणे बंधनकारक असेल. खतांच्या लिंकिंगचा गैरप्रकार आढळल्यास संबंधित कंपन्यांवर कठोर कारवाई केली जाईल, असे फडणवीस यांनी सांगितले. प्रत्येक तालुक्यात डिजिटल शेती शाळा – दुर्गम भागातील शेतकऱ्यांना आधुनिक शेतीचे तंत्रज्ञान उपलब्ध व्हावे, यासाठी प्रत्येक तालुक्यात डिजिटल शेती शाळा सुरू केल्या जाणार आहेत. या शाळांमधून कीड व्यवस्थापन आणि नव्या शेती पद्धतींवर मार्गदर्शन मिळेल. ‘महाविस्तार’ अॅपची सुविधा – शेतकऱ्यांना एकाच ठिकाणी सर्व माहिती उपलब्ध व्हावी, यासाठी ‘महाविस्तार’ अॅप विकसित करण्यात आले आहे. यात मराठी चॅटबॉट आणि व्हिडीओद्वारे शेतीविषयक माहिती उपलब्ध आहे. शेतकऱ्यांना कोणत्याही समस्येचे निरसन तात्काळ करता येईल. बँकांनी सिबिल स्कोअरची मागणी करू नये – शेतकऱ्यांना कर्ज देताना बँकांनी सिबिल स्कोअरची मागणी करू नये, असे निर्देश देण्यात आले आहेत. अशी मागणी करणाऱ्या बँक शाखांवर कारवाई केली जाईल, असे मुख्यमंत्र्यांनी स्पष्ट केले. खरीप हंगामाचे 204 लाख मेट्रिक टन उत्पादन लक्ष्य – यंदाच्या खरीप हंगामात 204 लाख मेट्रिक टन उत्पादनाचे लक्ष्य ठेवण्यात आले आहे. चांगल्या मान्सूनमुळे शेती उत्पादकता वाढेल, असा विश्वास व्यक्त करत फडणवीस यांनी दरवर्षी शेतीसाठी 5000 कोटींची गुंतवणूक केली जाईल, अशी घोषणा केली. शेतकऱ्यांना सजग राहण्याचे आवाहन – बोगस बियाणे आणि खतांच्या फसवणुकीपासून सावध राहण्यासाठी शेतकऱ्यांनी ‘साथी’ पोर्टल आणि ‘महाविस्तार’ अॅपचा वापर करावा, असे आवाहन मुख्यमंत्र्यांनी केले. यामुळे शेती उत्पादकता वाढण्यासह शेतकऱ्यांचे आर्थिक नुकसान टाळता येईल, असे त्यांनी नमूद केले.
