Konkona Sen Sharma : बॅालिवूडमधील प्रसिद्ध अभिनेत्री रुग्णालयात दाखल; फोटो आला समोर, चाहत्यांना केले ‘हे’ आवाहन
Konkona Sen Sharma : कोंकणाने इन्स्टाग्रामवर रुग्णालयातील एक फोटो शेअर केला. या पोस्टच्या माध्यमातून तिने आपल्याला डेंग्यू झाल्याचे सांगितले.
Konkona Sen Sharma : आपल्या सहजसुंदर आणि दमदार अभिनयाने प्रेक्षकांच्या मनात वेगळी ओळख निर्माण करणारी अभिनेत्री कोंकणा सेन शर्मा हिच्या चाहत्यांसाठी चिंतेची बातमी समोर आली आहे. कोंकणाला डेंग्यूची लागण झाली असून, उपचारांसाठी तिला रुग्णालयात दाखल करण्यात आले असून अभिनेत्रीने स्वतः सोशल मीडियावर पोस्ट शेअर करत आपल्या प्रकृतीबाबत चाहत्यांना माहिती दिली.
कोंकणाने इन्स्टाग्रामवर रुग्णालयातील एक फोटो शेअर केला. या पोस्टच्या माध्यमातून तिने आपल्याला डेंग्यू झाल्याचे सांगितले. मात्र, सध्या तिची प्रकृती सुधारली असून चाहत्यांनी घाबरण्याचे किंवा अधिक चिंता करण्याचे कारण नसल्याचेही तिने स्पष्ट केले आहे. कोंकणाच्या या पोस्टनंतर तिच्या चाहत्यांनी सुटकेचा नि:श्वास सोडला असून, सोशल मीडियावर चाहत्यांनी काळजी घेण्याचा सल्ला दिला आहे.
कोंकणाने आपल्या पोस्टमधून चाहत्यांना आणि मित्रमंडळींना डेंग्यूपासून सावध राहण्याचे आवाहनही केले आहे. अभिनेत्रीने म्हटले, “मित्रांनो, डेंग्यूपासून सावध रहा. मला रुग्णालयात दाखल करण्यात आले होते, पण आता माझी प्रकृती बरी आहे.” तिच्या या संदेशातून स्वतःच्या प्रकृतीबाबत अपडेट देतानाच तिने डेंग्यूच्या आजाराबाबत जागरूक राहण्याचा सल्लाही दिला आहे.
View this post on Instagram
अभिनेत्री कोंकणा सेन शर्मा सध्या तिच्या वैयक्तिक आयुष्यामुळेही चर्चेत आहे. गेल्या काही काळापासून तिचे नाव अभिनेता अमोल पराशरसोबत जोडले जात आहे. ते दोघे एकमेकांना डेट करत असल्याचे म्हटले जात आहे.
मात्र, या अफवांवर दोघांनीही अद्याप जाहीरपणे भाष्य केलेले नाही. कोंकणाने नुकताच अमोलसोबतचा एक गोंडस व्हिडिओ सोशल मीडियावर शेअर केला आहे, ज्यामुळे त्यांच्या नात्याबद्दलच्या चर्चांना पुन्हा एकदा उधाण आले आहे.
कोंकणा सेन शर्मा बॅालिवूडमधील चित्रपटसृष्टीतील प्रतिभावान अभिनेत्री म्हणून ओळखली जाते. आपल्या निवडक भूमिका आणि अभिनयातील सहजतेमुळे तिने प्रेक्षकांमध्ये आपले अढळ स्थान निर्माण केले आहे.
