पालघर – पालघर जिल्ह्यातील बनावट जिरे निर्मिती कारखाना पोलिसांनी सील केला आहे. रसायने वापरून तयार केल्या जात असलेल्या बनावट जिऱ्यामुळे नागरिकांचे आरोग्य धोक्यात आले आहे. आतापर्यंत बनावट जिऱ्याची किती विक्री झाली आणि किती लोकांच्या आरोग्याशी खेळ झाला, याचा तपास करण्याचे मोठे आव्हान पोलिसांपुढे आहे. पालघर मधील नंडोरे येथील हा बनावट कारखाना उघडकीस आल्यामुळे त्याचे धागेदोरे थेट भिवंडीपासून गुजरातमधील उंजापर्यंत पोहोचले आहेत. हे बनावट जिरे जिरा राईस करण्यासाठी वापरले जाते. मोठ्या हॉटेलमध्ये पॅरोट कंपनीच्या या जिऱ्याचा वापर केला जातो. बाजारात साडेचारशे रुपये किलो दराने विकल्या जात असलेल्या मूळ जिऱ्यापेक्षा हे बनावट जिरे अडीचशे ते तीनशे रुपये किलो इतक्या कमी दराने विकले जात होते. त्यामुळे व्यावसायिकांची या बनावट जिऱ्यांना पसंती होती. भिवंडी येथे बनावट जिरे विक्री करण्यासाठी काही लोक येत असल्याची माहिती पोलिसांना मिळाल्यामुळे पोलिसांनी ही कारवाई केली. त्यात शाबाद इस्लाम खान (रा. नवले फाटा, पालघर) व चेतन रमेश गांधी (रा. कांदिवली पश्चिम) अशा दोघांना अटक करण्यात आली आहे. त्यांच्या अटकेमुळे पालघर येथील बनावट जिरा कारखान्याचा तपास लागला. हे जिरे पाण्यात टाकले असता त्यातून काळा रंग आणि रसायने पाण्यात मिसळली. लाकडाचा भुस्सा,रसायनांचा वापर नोव्हेल इंडस्ट्रियल इस्टेटमध्ये जागृती इंटरप्राईजेस नावाचा बनावट जिरे निर्मिती कारखाना सुरू करण्यात आला होता. लाकडाचा भूसा व रसायने, बडीशेपाचा काढून टाकलेला टोकाचा भाग बनावट जिरे तयार करण्यासाठी वापरला जात होता. त्यासाठी लागणारा कच्चा माल गुजरातमधील उंजा इथून आणला जात होता. ठाण्या-मुंबईत विक्री ठाणे, नवी मुंबई भिवंडी आदी परिसरातील हॉटेलवर तसेच धाब्यांवर पॅरोट कंपनीच्या या जिऱ्याची मोठ्या प्रमाणात विक्री केली जात होती. पोलिस आयुक्त नवनाथ ढवळे, सहायक आयुक्त ईश्वर खैरनार, वरिष्ठ पोलिस निरीक्षक शंकर इंदलकर यांच्या पथकाने सापळा रचून नागाव फातमा नगर येथे पिकप टेम्पो जप्त केला. त्यात ८० गोण्यांमध्ये सात लाख २१ हजार सातशे रुपये किमतीचे बनावट जिरे होते.
