जगभरामध्ये आज १ एप्रिल हा दिवस एप्रिल-फूल्स-डे म्हणून मोठ्या उत्साहामध्ये साजरा करण्यात येत असून लोक एकमेकांना फसवून इतरांच्या आयुष्यामध्ये हास्याचे कारंजे उडविण्याचा प्रयत्न करत आहेत. मात्र भारतामध्ये सध्या लोकसभा निवडणुकांमुळे राजकारणाची रणधुमाळी सुरु असून ‘एप्रिल-फूल्स-डे’चा वापर देखील राजकीय पक्षांकडून तसेच त्यांच्या समर्थकांकडून एकमेकांवर टीका करण्यासाठी करण्यात येत आहे.
‘एप्रिल-फूल्स-डे’च्या निमित्ताने आज भारतामध्ये ट्विटर या समाजमाध्यमावर राजकीय युद्ध रंगले आहे. ‘एप्रिल-फूल्स-डे’ला सत्ताधारी भाजपकडून #PappuDiwas जाहीर करण्यात आले आहे तर प्रमुख विरोधी पक्ष असलेल्या काँग्रेसतर्फे आजच्या ‘एप्रिल-फूल्स-डे’ निमित्ताने #ModiMatBanao असा हॅशटॅग ट्विट करण्यात आला आहे.
#PappuDiwas आणि #ModiMatBanao हे दोन्हीही हॅशटॅग आज ट्विटरवर ट्रेंडिंग असून या हॅशटॅगद्वारे भाजप व काँग्रेससमर्थकांची एकमेकांवर जोरदार चिखलफेक सुरु आहे. मोदी समर्थकांकडून काँग्रेस अध्यक्षांना पप्पू म्हणून हिणवण्यात येत आहे तर काँग्रेस समर्थकांकडून पंतप्रधानांची खिल्ली उडवताना मोदी मत बनाओ असा हॅशटॅग देण्यात येत आहे.