Eye Care: उन्हाळा सुरू होताच तापमान झपाट्याने वाढतं आणि त्याचा थेट परिणाम आपल्या डोळ्यांवरही होतो. प्रखर ऊन, धूळ, घाम आणि सतत स्क्रीनसमोर बसण्यामुळे डोळ्यांत जळजळ, खाज, कोरडेपणा आणि चुभण यांसारख्या समस्या वाढतात. विशेषतः विद्यार्थी आणि ऑफिसमध्ये काम करणाऱ्या लोकांना या त्रासाचा अधिक सामना करावा लागतो. त्यामुळे या दिवसांत डोळ्यांची योग्य काळजी घेणं खूप महत्त्वाचं आहे. तज्ज्ञांच्या मते, डिजिटल स्क्रीनचा अतिवापर आणि उन्हात जास्त वेळ राहणं यामुळे डोळ्यांवर ताण येतो. त्यामुळे डोळ्यांना विश्रांती देणं आवश्यक आहे. यासाठी ‘20-20-20 नियम’ खूप उपयुक्त ठरतो. या नियमाप्रमाणे, दर 20 मिनिटांनी स्क्रीनपासून नजर हटवून 20 फूट दूर असलेल्या वस्तूकडे किमान 20 सेकंद पाहावं. यामुळे डोळ्यांच्या स्नायूंवरील ताण कमी होतो. डोळ्यांना थंडावा देण्यासाठी ‘आय पामिंग’ हा एक सोपा उपाय आहे. यामध्ये दोन्ही हातांच्या तळव्यांना एकमेकांवर घासून थोडी उब निर्माण करावी आणि ती बंद डोळ्यांवर हलक्या हाताने ठेवावी. यामुळे डोळ्यांच्या नसांना आराम मिळतो आणि थकवा कमी होतो. Eye Care तसेच, डोळ्यांच्या व्यायामाकडेही लक्ष देणं गरजेचं आहे. एखाद्या बिंदूकडे किंवा दिव्याच्या ज्योतीकडे काही वेळ न पापणी लवता पाहणं फायदेशीर ठरतं. याशिवाय डोळे वर-खाली आणि गोल फिरवण्याचे व्यायाम केल्याने डोळ्यांची हालचाल सुधारते आणि एकाग्रता वाढते. उन्हाळ्यात बाहेरून आल्यानंतर डोळ्यांवर थंड पाण्याचे शिंतोडे मारणंही खूप उपयोगी ठरतं. यामुळे डोळ्यांतील जळजळ तात्काळ कमी होते आणि ताजेपणा जाणवतो. फक्त उपायच नव्हे, तर जीवनशैलीतही काही बदल करणं आवश्यक आहे. काम करताना पुरेसा प्रकाश असावा, स्क्रीनची ब्राइटनेस योग्य ठेवावी आणि सर्वात महत्त्वाचं म्हणजे दररोज 7 ते 8 तासांची चांगली झोप घ्यावी. झोप पूर्ण झाल्यास डोळ्यांना नैसर्गिकरित्या विश्रांती मिळते. एकूणच, उन्हाळ्यात डोळ्यांची योग्य काळजी घेतल्यास जळजळ, खाज आणि इतर समस्या टाळता येऊ शकतात. आपल्या डोळ्यांची थोडी काळजी घेतली, तर मोठ्या त्रासापासून आपण सहज वाचू शकतो.
